Արտակարգ դեպք՝ Սյունիքում․ հսկայական քարը սարալանջից գլորվել և հայտնվել է բնակչի տան տարածքում

Այսօր՝ փետրվարի 8-ին, արտակարգ դեպք է տեղի ունեցել Սյունիքի մարզում։ Ժամը 18։10-ի սահմաններում ՀՀ ներքին գործերի նախարարության փրկարար ծառայության  9-11 ճգնաժամային կառավարման ազգային կենտրոն ահազանգ է ստացվել, որ Սիսիան քաղաքի մոտակա սարից մեծ ծավալի քարը գլորվել և հարվածել է քաղաքի առաջին փողոցի թիվ 21 տանը հարակից ավտոտնակի պատին․ անհրաժեշտ է փրկարարների օգնությունը, գրում է Shamshyan-ը։ 

Օպերատիվորեն ժամանել են Սիսիանի թիվ 57 հրշեջ փրկարարական ջոկատից՝ 1 մարտական հաշվարկ։

Պարզվել է, որ 12 խ․մ ծավալով քարը հարակից սարալանջից գլորվել և հարվածել է ավտոտնակի պատին, վնասելով պատից մոտ 12 ք․մ հատված:

Աղբյուրի տեղեկություններով բարեբախտաբար տուժածներ չկան։