Հադրութից ու Շուշիից 2020 թվականին բռնի տեղահանվածներից շատերը չեն մասնակցել բնակապահովման ծրագրին. Ինչ նոր ծրագիր է առաջարկում կառավարությունը

Հադրութից և Շուշիից բռնի տեղահանված ընտանիքները, որոնք 2020թ.ին տեղահանվածների համար նախատեսված բնակապահովման ծրագրի շահառու լինելու հիմքով զրկվել էին « 40+10» ծրագրից, բայց իրականում չէին հանդիսացել ծրագրի շահառու, իրավունք են ստացել ներգրավվելու Արցախից բռնի տեղահանվածների համար հաջորդ ծրագրին։ Այս մասին «Փաստինֆո» -ին տեղեկացրեց ՀՀ Աշխատանաքի և սոցիալական ծառայությունների նախարարության ներկայացուցիչ Գայանե Ղարագյոզյանը։

Նրա փոխանցմամբ՝ խոսքը 300 ընտանիքի մասին է, որոնք ընդգրկված են եղել 2020թ.-ին տեղահանվածների համար նախատեսված բնակապահովման ծրագրի 10 մլն դրամի հավաստագրի ցուցակում, բայց իրենց անհայտ պատճառներով չեն իմացել, որ այդ ծրագրի շահառու են և ժամանակին չեն դիմել։

«Այդ ծրագրի վեջնաժամկետը 2024 թ.-ի հուլիսի 1-ն էր։ Երբ այդ ընտանիքները «40+10» ծրագրի դիմումները լրացնելիս մերժվել էին այդ հիմքով, որ հանդիսանում են «Բնակապահովման» ծրագրի շահառու, նոր իմացել են, որ իրենք պետք է դիմեին, բայց արդեն չէին կարող, ծրագիրն ավարտվել էր։ Դրանից հետո հասկանալի դարձավ, որ հրատապ լուծում է պահանաջվում, որովհետև մարդիկ, ըստ էության, բնակապահովման ծրագրից զրկվել էին, չէին կարող դիմել նաեւ մյուս ՝2023 թ-ին տեղահանվածների ծրագրին, միաժամանակ զրկվել էին նաև « 40+10» ծրագրից, ու այդպիսով ամեն ինչից զրկվել էին»,- նշեց մեր զրուցակիցը։

Նրա տեղեկացմամբ՝ կառավարությունը որոշում է կայացրել, որն իրավունք է տալիս 2020թ. տեղահանվածներին՝ դիմել շունչը 3 մլն դրամի ծրագրին։

«Այս մասով շատ վստահ չասեմ, որովհետև ես չեմ ծրագրի պատասխանատուն, բայց եթե չեմ սխալվում կա արդեն նախագիծ, որը չգիտեմ հաստատվել է , թե մոտ օրերս կհաստատվի, որ իրենց նաև «40+10»-ը կվերականագնվի», - ասաց Ղարագյոզյանը։