Բոլոր պայմաններին հարմարվում ենք, բայց նորմալ վայրում աշխատելու իրավունք ունենք․ ԵՊԿ-ի դասախոս (տեսանյութ)

Կոնսերվատորիայում անձրևաջրերի թողած ծանր հետևանքի պատճառով ուսանողները շարունակում են դասերը մեծամասամբ հեռավար անցկացնել, մինչև 730 հազար դրամ ուսվարձ վճարող ուսանողը զրկված է գործիքով ու դասախոսի հետ կենդանի շփումով պարապելու իրավունքից։

Euromedia24.com-ի հետ զրույցում Կոսերվատորիայի դասախոս Ծովինար Հովհաննիսյանը մեծ ափսոսանքով ընդգծել է, որ իրավիճակի պարտադրանքին զոհ դարձած ուսանողների նվագելու դասապրոցեսը խաթարված է հեռավար լինելու պատճառով։

«Պետք է հեռավարը փոխվի առկա ուսուցման, իսկ դրա համար հարկավոր է ունենալ նորմալ պայմաններ, բայց այսօր Կոնսերվատորիայի նկուղներում ու միջանցքում են դասավանդում ուսանողներին, անձրևաջրերից ոչ միայն լսարանները, այլ նաև գործիքներն է պետք փրկել։ Միակ լսարանը, որ փրկվել է անձրևաջրից, այդ խորհրդավոր «փրկությունը» ես կապում եմ Կոմիտասի կիսանդրու հետ․ այն դրված է այդ լսարանում և փաստացի այդ լսարանում ջրեր չէին հոսել»,-ասել է դասախոսը։

Նրա խոսքով՝ իրենք անհամբեր սպասում են Կոնսերվատորիայում 2021-ից մեկնարկած մյուս մասնաշենքի նորոգման աշխատանքների ավարտին, որովհետև միայն մեկ լսարանն, իր խոսքով, բավարար չէ։ Ցանկալի է պետության հոգածությունը լինի, որովհետև «Ակադեմիական քաղաքի» մասին են խոսում, բայց դրա հիմքերը չկան դեռ՝ «մենք չենք տեսնում»։ Իսկ այսօրվա ուսանողները ցանկություն ունեն սովորելու, ունեն իրենց իրավունքը նորմալ պայմաններում ուսանելու, 4 տարի կսովորեն ու կավարտեն։

«Մենք ստիպված հարմարվում ենք նաև այս պայմաններին, ես չեմ ֆինանսներ հատկացնողը, բայց պետությունը պետք է մտածի չնախատեսված ծախսերը հոգալու մասին, նաև ունենք վերանորոգվող մասնաշենք, որի աշխատանքները դանդաղում են, թե ինչու չի արագացվում այդ պրոցեսը՝ մենք, իհարկե, չգիտենք»,- ասել է Կոնսերվատորիայի դասախոս Ծովինար Հովհաննիսյանը։

ՄԱՆՐԱՄԱՍՆԵՐԸ՝ ՏԵՍԱՆՅՈՒԹՈՒՄ