Առնոլդ Շվարցենեգերն աջակցություն է հայտնել Քամալա Հարիսին

Առնոլդ Շվարցենեգերը, որը Կալիֆորնիայի նահանգապետ է դարձել հանրապետականի կարգավիճակով, քննադատել է ԱՄՆ երկու առաջատար քաղաքական կուսակցություններին, գրում է գերմանական Bild պարբերականը:  

«Ես անկեղծ կլինեմ ձեզ հետ. ներկա պահին ոչ մի կուսակցություն իմ սրտով չէ: Իմ հանրապետականները մոռացել են ազատ շուկայի առավելությունները, ուռճացրել են դեֆիցիտը և մերժում են ընտրությունների արդյունքները։ Պակասն էլ դեմոկրատները չեն, որոնք այնքան էլ լավ չեն գլուխ հանում դեֆիցիտից, և ես անհանգստանում եմ, որ նրանց տեղական քաղաքականությունը վնասում է մեր քաղաքներին՝ բազմապատկելով հանցավորությունը»,- գրել է նա:

Այնուամենայնիվ, նախագահական ընտրություններից առաջ Շվարցենեգերը հակված է դեմոկրատների օգտին, քանի որ Թրամփի մասին ոչ մի լավ բան չունի ասելու:  «Մի թեկնածու, որն  իր կողմնակիցներին ուղարկում է գրոհելու Կապիտոլիումը, իսկ ինքն այդ ամենին հետևում է դիետիկ կոլան ձեռքին: Մի թեկնածու, որը ցույց չի տվել որևէ այլ քաղաքականություն իրականացնելու ունակություն, բացի հարկերի կրճատումից, որն օգնում է իր դոնորներին և ինձ նման այլ հարուստ մարդկանց, բայց էլ ոչ մեկին: Մի թեկնածուն, որն իր մտքերի հետ հակառակվող ամերիկացիներին Չինաստանից, Ռուսաստանից կամ Հյուսիսային Կորեայից ավելի մեծ թշնամիներ է համարում, ընդունակ չէ լուծելու մեր խնդիրները»:

Շվարցենեգերը կարծիքով ԱՄՆ-ը կարող է միայն «առաջ գնալ որպես երկիր» Քամալա Հարիսի և Թիմ Ուոլսի հետ, նույնիսկ եթե ինքը «համաձայն չէ նրանց ծրագրի հետ»: Ըստ  Առնոլդ Շվարցենեգերի՝ Միացյալ Նահանգների բարօրություն գերակա է կուսակցական պատկանելությունից:

Աղբյուր` news.am