Տարոն Մարգարյանն աշխատանքային այցով Արաբկիր վարչական շրջանում էր. «Բացեցինք նորաստեղծ շախմատի դպրոցը» (լուսանկարներ)

Տարոն Մարգարյանը Facebook սոցցանցի իր էջում գրել է.

«Այսօր աշխատանքային այցով Արաբկիր վարչական շրջանում էի, որտեղ մեր համաքաղաքացիների հետ շփվելու և նրանց խնդիրները լսելու հնարավորություն ունեցա: Երևանի զարգացման 2014թ. ծրագրերի շրջանակում արդեն ավարտական փուլում են մայրաքաղաքի բակերի համալիր բարեկարգման, նոր այգիների և պուրակների ստեղծման աշխատանքները, և այսօր մեր բնակիչների տնօրինմանը հանձնեցինք ամբողջովին վերակառուցված Հայաստանի Ամերիկյան համալսարանին հարակից այգին: Ապա Գյուլբենկյան փողոցում գտնվող պուրակում հանդիսավորությամբ բացեցինք քանդակագործ Գարեգին Դավթյանի հեղինակած բարերար Գալուստ Գյուլբենկյանի կիսանդրին: Շրջայցի շրջանակում Սունդուկյան 23 և Վրացական 6 հասցեի բնակիչների հետ էլ մասնակցեցի բարեկարգված բակերի բացման արարողությանը: Ապա այցելեցի Սունդուկյան 90 հասցեին հարակից այգին, որտեղ երբ նոր էինք սկսում աշխատանքները, ինչ-ինչ նպատակներից ելնելով ոմանք սուտ լուրեր էին տարածել բնակիչների շրջանում՝ իբր այս տարածքներում շենքեր են կառուցվելու: Ժամանակը ցույց տվեց բոլոր նրանց խոսքի արժեքը, ովքեր, չակերտավոր սրտացավություն ցուցաբերելով, փորձում էին խոչընդոտել ծրագրի իրականացմանը: Մենք շարունակելու ենք մեր որդեգրած քաղաքականությունն այնքան ժամանակ, մինչև մայրաքաղաքում այլևս անբարեկարգ բակ չմնա:

Այսօր բացեցինք նաև Արաբկիրի նորաստեղծ շախմատի դպրոցը:

Մենք Հայաստանի շախմատի ակադեմիայի հետ նախաձեռնեցինք վարչական շրջաններում շախմատի դպրոցների հիմնադրման ծրագիրը, որի շրջանակում օրեր առաջ էլ Մալաթիա-Սեբաստիա վարչական շրջանի շախմատի դպրոցը ևս արդեն շահագործման հանձնվեց, իսկ առաջիկայում շախմատասեր մեր փոքրիկներին կհանձնենք նաև Էրեբունի, Նոր Նորք և Կենտրոն վարչական շրջաններում կառուցված դպրոցները: Ըստ էության, առայժմ մայրաքաղաքի 4 վարչական շրջաններում դեռևս չունենք շախմատի դպրոցներ, որոնց ուղղությամբ աշխատանքներ կնախաձեռնենք արդեն հաջորդ տարի:

Շնորհակալություն եմ հայտնում մեր համաքաղաքացիներին շախմատի նկատմամբ ցուցաբերած հետաքրքրության համար, և ուրախ եմ նկատել, որ շախմատի դպրոցների անվճար գործելու հանգամանքը մայրաքաղաքում զգալիորեն ավելացրել է շախմատասեր մանուկների և պատանիների թիվը:

Ամփոփելով նշեմ, որ ևս մեկ հագեցած օր ունեցա։ Ուրախ էի հանդիպել Երևանի ձեռքբերումներով անկեղծորեն ուրախացող մեր համաքաղաքացիներին»։