Տիգրան Համասյանը համերգային շրջագայությամբ Եվրոպայում է

Հայտնի ջազ-դաշնակահար Տիգրան Համասյանը 2015-ին իր երկրպագուներին կուրախացնի նոր ալբոմով: Երաժիշտը ներկայումս համերգային շրջագայության է մեկնել Եվրոպա: Համերգներ են ծրագրված Ֆրանսիայում, Գերմանիայում, Նիդեռլանդներում, Բելգիայում, Շվեյցարիայում և եվրոպական այլ երկրներում:

Ինչպես հաղորդում է «Ասպարեզ» պարբերականը, ալբոմի թողարկման մասին մանրամասները հայտնի կդառնան մոտ ապագայում:

Տիգրան Համասյանը ծնվել է 1987 թվականին Գյումրիում: Երկու տարեկանից նա սկսում է լուրջ հետաքրքրություն ցուցաբերել երաժշտության հանդեպ: Ռադիոն, ձայնագրիչն ու երաժշտական գործիքները տղային ցանկացած խաղալիքից ավելի էին գրավում: Արդեն երեք տարեկանում անսխալ կարողանում էր երգել մեղեդիներ այնպիսի լուրջ խմբերի երգացանկից, ինչպես' The Beatles, Led Zeppelin, Queen, սակայն նա առանձնակի հաճույքով երգում էր Լուի Արմստրոնգի (Louis Armstrong) երգերը: Յոթ տարեկանում լիովին արտահայտվում է նրա սերը ջազի հանդեպ. նա ողջ օրը սկսում է լսել ջազային տարբեր ոճերի ստեղծագործություններ և փորձում իմպրովիզացիա անել դաշնամուրով: Այնուհետև Տիգրանն ընդունվում է երաժշտական դպրոց:

1997 թվականին Համասյանի ընտանիքը տեղափոխվում է Երևան, և նա ջազով լրջորեն զբաղվելու հնարավորություն է ստանում: Այնուհետև նա մշտական բնակության է մեկնում ԱՄՆ: Այսօր Համասյանի երաժշտությունը բարձր գնահատականի է արժանանում ԱՄՆ-ից մինչև Ճապոնիա սփռված երաժշտագետների կողմից: