Ավստրալիայում մեկնարկել են «Կարիբյան ծովի ծովահենները 5» ֆիլմի նկարահանումները

«Կարիբյան ծովի ծովահենները» ֆրանշիզի հինգերորդ ֆիլմի նկարահանումները մեկնարկել են Ավստրալիայի Քվինսլենդ քաղաքում: Այդ մասին, ինչպես տեղեկացնում է «Արմենպրես»-ը, հաղորդվում է Disney ընկերության ցանցային բլոգում, որը ղեկավարում է նախագիծը: «Ննջեցյալները հեքիաթներ չեն պատմում» ենթավերնագրով կինոնկարը պետք է վարձույթ դուրս գա 2017 թվականի հունիսին:

Բլոգում զետեղված է նաև ապագա ժապավենի կարճ բովանդակությունը: Սյուժեի համաձայն՝ կապիտան Ջեկ Ճնճղուկը, որին կրկին մարմնավորելու է Ջոնի Դեփը, բացահայտում է, որ իրեն հետապնդում է վաղեմի հակառակորդը՝ կապիտան Սալազարը, և նրա անիրական ծովահենները: Չարագործները մտադրվել են ոչնչացնել աշխարհի բոլոր նավաստիներին: Հերոսին կօգնի ողջ մնալ միայն հզոր արտեֆակտը՝ Պոսեյդոնի եռաժանին, որն իր տիրոջը ծովերի վրա իշխելու շնորհ է տալիս:

Հայտնի է, որ Ճնճղուկի անհաշտ հակառակորդի դերը խաղալու է Հավիեր Բարդեմը: Բացի այդ, դերասանական կազմին միացել են Կայա Սկոդելարիոն, Քրիստոֆ Վալցը, Բրենթոն Թուեյթսը և, հավանաբար, Օռլանդո Բլումը:

«Կարիբյան ծովի ծովահենները. «Սև մարգարտի անեծքը» շարքի առաջին ֆիլմը էկրան է բարձրացել 2003 թվականին՝ վարձույթում հավաքելով 654 մլն դոլար: Սիկվելը, որը հայտնվեց երեք տարի հետո, արդեն վաստակել է ավելի քան 1 միլիարդ դոլար: Երրորդ կինոնկարն էկրան է դուրս եկել 2007 թվականին՝ նույնպես դառնալով տարվա ամենահասութաբեր ժապավենը: Չնայած այն բանին, որ սկզբնապես պլանավորվում էր սահմանափակվել եռերգությամբ, Disney ընկերությունը 2011 թվականին թողարկեց չորրորդ ֆիլմը: