ԵԱՀԿ ՄԽ համանախագահները օրվա երկրորդ կեսին կհանդիպեն ԼՂՀ նախագահ Բակո Սահակյանին

ԵԱՀԿ Մինսկի խմբի եռանախագահներն ու ԵԱՀԿ գործող նախագահի անձնական ներկայացուցիչ Անջեյ Կասպրշիկն արդեն Ստեփանակերտում են: ԼՂՀ նախագահ Բակո Սահակյանի հետ հանդիպումը կկայանա օրվա երկրորդ կեսին' երեկոյան ժամը 18:00-ին: «Երեկոյան կկայանա ԼՂՀ նախագահի հանդիպումը ԵԱՀԿ Մինսկի խմբի համանախագահների հետ: Հանդիպմանը ներկա կգտնվի նաեւ ԼՂՀ արտաքին գործերի նախարար Կարեն Միրզոյանը: Այս անգամ համան ախագահները ցանկություն են հայտնել հանդիպել նաեւ ԼՂՀ պաշտպանության նախարար Մովսես Հակոբյանի հետ: Հանդիպման արդյունքների առնչությամբ ավելի ուշ հանդես կգանք հայտարարությամբ»,- ասաց Դավիթ Բաբայանը:

Ավելի վաղ «Արմենպրես»-ի հետ զրույցում Դավիթ Բաբայանը շեշտել է, որ Արցախի դիրքորոշումը մնացել է նույնը: «Մենք այն բազմիցս ներկայացրել ենք եւ այս անգամ էլ պաշտոնական Ստեփանակերտը կներկայացնի իր տեսակետերը: Բնականաբար, քննարկումների կենտրոնում կլինեն սահմանային միջադեպերը: Մենք մի շարք առաջարկություններ կներկայացնենք Մինսկի խմբի համանախագահներին: Մասնավորապես, այս տարի Բաքվում կայանալու է Եվրոպական խաղերը եւ այդ ժամանակ, ինչպես ընդունված է, բոլոր տեսակի հակամարտությունները պետք է սառեցվեն: Սա պ ետք է քննարկվի: Նաեւ մեր ուշադրության կենտրոնում է հարցը, որպեսզի մեխանիզմներ մշակվեն սահմանային միջադեպերի առնչությամբ հետաքննություն իրականացնելու համար»,- ասել էր Դավիթ Բաբայանը:

Փետրվարի 16-ին ԵԱՀԿ Մինսկի խմբի համանախագահներն այցելել էին տարածաշրջան: Փետրվարի 16-ին համանախագահները Բաքվում հանդիպել են Ադրբեջանի նախագահին եւ ԱԳ նախարարին: Փետրվարի 17-ին Երեւանում նրանք հանդիպել են ՀՀ նախագահին եւ արտաքին գործերի նախարարին: