Նորաշեն համայնքի հիմնանորոգված ավտոճանապարհները հանձնվել են շահագործման

Արարատի մարզի Նորաշեն-Դվին և Քաղցրաշեն-Նորաշեն ավտոճանապարհների շուրջ 600մ երկարությամբ հատվածներում կատարվել են հիմնանորոգման աշխատանքներ:

Ինչպես տեղեկացնում են ՀՀ տրանսպորտի և կապի նախարարության տեղեկատվության և հասարակայնության հետ կապերի բաժնից, հիմնանորոգումն անցկացվել է «Պետական նշանակության ավտոճանապարհների հիմնանորոգում» ծրագրի շրջանակում:

Մինչ վերանորոգումը, ավտոճանապարհների ծածկերը գտնվում էին վատ վիճակում: Առաջացել էին փոսեր, լայնական, երկայնական և ցանցավոր ճաքեր: Իջատեղերը գտնվում էին անմխիթար վիճակում: Նորաշեն-Դվին ավտոճանապարհի մայթերին կային հողաթմբեր, եզրաքարերը քանդվել էին:

ՀՀ տրանսպորտի և կապի նախարարության «Տրանսպորտի ԾԻԳ» պետական հիմնարկի պատվերով «Ավտոճանապարհային մեքենաներ» ՓԲ ընկերության ճանապարհաշինարարները Նորաշեն-Դվին և Քաղցրաշեն-Նորաշեն ավտոճանապարհներին կատարել են ասֆալտբետոնե պատվածքի փոսային նորոգման, հարթեցնող շերտի տեղադրման, ասֆալտբետոնե ծածկի կառուցման, իջատեղերի և մայթերի նորոգման աշխատանքներ: Տեղադրվել են նաև ճանապարհային նոր նշաններ, կատարվել է գծանշում, իսկ Նորաշեն գյուղի դպրոցի հարակից տարածքում գծանշվել է հետիոտնային անցումը:

Հիմնանորոգումից հետո նշված համայնքները կապող ավտոճանապարհների երթևեկությունը բարելավվել է' դառնալով ավելի անվտանգ և հարմարավետ: Նորաշեն-Դվին ավտոճանապարհի հիմնանորոգման համար ՀՀ պետական բյուջեից հատկացվել է 24 մլն 498 հազար դրամ, իսկ Քաղցրաշեն-Նորաշեն ճանապարհահատվածի համար' 17 մլն 228 հազարդրամ: