Կոալիցիա վերադառնալը մեզ համար խնդիր չէ. Արմեն Ռուստամյան

ՀՀ Ազգային ժողովի ՀՅԴ խմբակցության ղեկավար Արմեն Ռուստամյանն անդրադարձել է խոսակցություններին, թե ՀՅԴ-ն կարող է կրկին կոալիցիա կազմել իշխանությունների հետ: Ազգային ժողովում լրագրողների հետ զրույցում Արմեն Ռուստամյանը հիշեցրեց, որ ՀՅԴ-ն իր կամքով է լքել կոալիցիան՝ ընդգծելով, որ կարող են ցանկացած պահի վերադառնալ: «Կոալիցիա վերադառնալը մեզ համար խնդիր չէ: Սակայն կոալիցիան լքելու որոշումն ինքնանպատակ չի եղել: Եթե մարդու մտքին միայն պաշտոն ունենալն է, նա կարող է հազար պատճառ բռնել այդ պաշտոնում մնալու համար: Նույնն էլ մենք. կարող էինք մինչև հիմա կոալիցիայում լինել»,- «Արմենպրես»-ի հաղորդմամբ՝ նշեց նա:

Դիտարկմանը, թե ՀՀ նախագահն արդեն Ազգային ժողովից հետ է կանչել հայ-թուրքական արձանագրությունները, իսկ ժամանակին ՀՅԴ-ն կոալիցիան լքել էր հենց հայ-թուրքական արձանագրությունների պատճառով, Ռուստամյանը հիշեցրեց, որ իրենք հրապարակել են 7 կետերից բաղկացած առաջարկներ և սպասում են դրանց իրականացման ուղղությամբ իշխանությունների քայլերին: «Եթե մենք տեսնենք, որ մեր առաջարկների իրականացման համար կա քաղաքական կամք, այո, մենք պատրաստ ենք մտնել կոալիցիա և այդ ուղղությամբ աշխատել, մեր լուման ունենալ»,- նշեց Ռուստամյանը:

Նա ընդգծեց, որ իրենք վերջին շրջանում իշխանությունների հետ բանակցությունների մեջ են մտել՝ երկրում արմտական բարեփոխումերի իրականացման հեռանկարով: «Այդ ամբողջական փոփոխությունների մեր պատկերացումը մենք հրապարակային հայտնել ենք և կոչ ենք արել մեր մյուս գործընկերներին միանալ այդ գործընթացներին, Դաշնակցությանը միայնակ չթողնել, որովհետև մի բան է, որ մենակ մենք սա պահանջենք, այլ բան է, երբ մեզ հետ լինեն այլ քաղաքական ուժեր: Եվ այդ պահանջների արդյունքում փոփոխությունները կլինեն շատ ավելի խորքային և արմատական: Մենք սա ենք ցանկանում հիմա անել, այլ նպատակ մենք չենք հետապնդել»,- նշեց Ռուստամյանը: