«Գագիկ Ծառուկյանը հասկացավ, որ տեղի ունենալիք ողբերգության ողջ պատասխանատվությունն իր վրա է լինելու»

Հայ Հեղափոխական Դաշնակությունը վերջին օրերին բոլոր ջանքերը ներդրել է երկրում առկա ներքաղաքական լարված իրավիճակը թուլացնելու ուղղությամբ: Այս մասին Ազգային ժողովում լրագրողների հետ հանդիպմանը հայտարարեց ԱԺ ՀՅԴ խմբակցության ղեկավար Արմեն Ռուստամյանը: «Մենք վերջին օրերին արել ենք ամեն ինչ, որպեսզի գտնվի այնպիսի հանգուցալուծում, որ բոլորի համար բավարար պայմաններ ստեղծի իրենց նպատակներն իրականացնելու առումով»,- «Արմենպրես»-ի հաղորդմամբ՝ նշեց Ռուստամյանը:

Անդրադառնալով ՀՀ նախագահ Սերժ Սարգսյանի և ԲՀԿ առաջնորդ Գագիկ Ծառուկյանի հանդիպման մասին խոսակցություններին՝ Ռուստամյանն ընդգծեց, որ իրենց տեղեկություններով այդ հանդիպումը կայացել է: «Ամենայն հավանականությամբ, այդ հանդիպումը տեղի ունեցել է, որ այսպիսի շրջադարձային փոփոխություն է եղել: Հիմա էական չէ այն' հանդիպումը եղել է, թե ոչ: Էական է այն, որ այն, ինչ այս ընթացքում հայտարարվեց «Բարգավաճ Հայաստան» կուսակցության կողմից, ողջունելի է: Մենք շատ ուրախ ենք, որ առողջ տրամաբանությունը հաղթանակել է: Ունենք մի վիճակ, որ լավ նախադրյալն եր են ստեղծված, որպեսզի բոոր քայլերն ուղղվեն այն խնդիրների լուծմանը, որոնք առկա են և առաջացնում են մեր ժողովրդի արդար դժգոհությունը: Սակայն մենք չենք համարում, որ սրանով խնդիրները լուծվել են: Մենք շարունակելու ենք ջանքեր գործադրել, որպեսզի ստեղծված լավ նախադրյալներն արժևորվեն»,- ասաց Ռուստամյանը:

Նա ընդգծեց, որ իրենք ջանքեր են գործադրել, որպեսզի չլինեն քայլեր, որոնք կարող էին երկրում արյունահեղության հանգեցնել: Ռուստամյանի խոսքով՝ այս տրամաբանությունը հաղթել է, ինչը ողջունելի է: «Սա լավ նախադրյալ է, սակայն ես կարծում եմ, որ առջևում լինելու են քննարկումներ, թե ինչպես ենք պատկերացնում այս հանգիստ պայմաններում խնդիրների լուծումը, որոնց առկայությունն ի վերջո կարող է կրկին նոր լարվածության բերել: Սա պետք է բոլորի սթափության համար լավ նախադրյալ լինի, մասնավորապես իշխանությունների համար, որովհետև այս հարցում շատ մեծ պատասխանատվություն ունեն իշխանությունները: Նրանք նույնպես պետք է ըստ արժանավույն գնահատեն այն հայտարարությունները, որ այսօր արվել են Գագիկ Ծառուկյանի և նրա ղեկավարած քաղաքական ուժի կողմից: Մենք չպետք է այս ամենը դիտարկենք որպես մի կողմի հաղթանակ մյուսի նկատմամբ: Մեզ մոտ նման բան չի կարող լինել. կամ բոլորս հաղթում ենք, կամ բոլորս միասին պարտվում»,- հայտարարեց Ռուստամյանը:

Պատգամավորը նկատում է, որ բոլորը պետք է առաջնորդվեն հենց վերը նշված տրամաբանությամբ, իսկ բոլոր նրանք, ովքեր սպասում էին, որ երկու կողմերի բախման արդյունքում ձեռքերը կրակի վրա կտաքացնեն, կարող են հիասթափվել, որովհետև դա չի լինելու: «Այդ մարդիկ, բնականաբար դրանից լավ չեն զգալու, ինչ ասես խոսելու են: Ես նկատի ունեմ այն մարդկանց, ովքեր ցանկանում էին այդ կրակի վրա ձեռքերը տաքացնել, մի բան էլ յուղ էին լցնում այդ կրակի վրա: Նման մարդկանց, այո, Գագիկ Ծառուկյանը հիասթափեցրել է»,- ասաց Ռուստամյանը՝ ընդգծելով, որ չի կարելի թույլ տալ, որպեզի ոմանք Հայաստանում ավելորդ լարվածություն ստեղծելու եղանակով թուլացնեն երկիրը, ինչից կարող է օգտվել արտաքին թշնամին:

Ռուստամյանն ընդգծեց, որ իրականում Գագիկ Ծառուկյանը հասկացավ, որ հետագայում տեղի ունենալիք ողբերգության ողջ պատասխանատվությունն իր վրա է լինելու և կայացրեց ճիշտ որոշում: «Սա թույլ մարդու արարք չէ: Գագիկ Ծառուկյանը հասկացավ իրականությունը և կայացրեց ճիշտ որոշում, որը մենք ողջունում ենք: Իրականում Ծառուկյանի որոշումը ուժեղ և իրավիճակը ճիշտ գնահատող մարդու որոշում էր»,- հայտարարեց պատգամավորը:

«Բարգավաճ Հայաստան» կուսակցությունը հայտարարություն է տարածել, որում տեղեկացրել է, որ չեղյալ է համարում փետրվարի 20-ին Ազատության հրապարակում նախատեսված հանրահավաքը: Հայտարարություն է տարածել նաև ԲՀԿ նախագահ Գագիկ Ծառուկյանը' նշելով, որ Հայաստանում առկա խնդիրները լուծելու համար մեզ անհրաժեշտ է ոչ թե պատերազմել միմյանց դեմ, այլ հանգիստ, առանց միմյանց վիրավորելու աշխատել, ցույց տալ առկա բոլոր բացերը, գտնել լուծումներ և կյանքի կոչել դրանք: