Հայ և բելառուս նախարարները սպորտի բնագավառում համագործակցության ծրագիր են ստորագրել

Մինսկում գտնվող ՀՀ սպորտի և երիտասարդության հարցերի նախարար Գաբրիել Ղազարյանն ու Բելառուսի Հանրապետության սպորտի և տուրիզմի նախարար Ալեքսանդր Շամկոն ստորագրել են ֆիզիկական կուլտուրայի և սպորտի բնագավառում երկու երկրների նախարարությունների 2015-2016 թթ. համագործակցության ծրագիրը: Այս մասին տեղեկացրին ՀՀ սպորտի և երիտասարդության հարցերի նախարարո ւթյան տեղեկատվության և հասարակության հետ կապերի բաժնից:

Ծրագրի իրականացումը նախատեսում է երկու երկրների ֆիզիկական կուլտուրայի և սպորտի ոլորտում պետական կառավարման մարմինների, հասարակական և տարածաշրջանային մարզական կազմակերպությունների, ինչպես նաև մարզական ուղղվածության ուսումնական, գիտական, բժշկական հիմնարկների համագործակցություն:

Ստորագրման արարողությանը ներկա է եղել նաև Բելառուսի Հանրապետությունում ՀՀ արտակարգ և լիազոր դեսպան Արմեն Խաչատրյանը:

Նախարար Գաբրիել Ղազարյանը ի նշան սպորտի և երիտասարդության հարցերի ոլորտում գործընկերային սերտ կապեր հաստատելու ու համագործակցելու, ինչպես նաև երկու երկրների նախարարությունների միջև փոխըմբռնման հուշագրի դրույթներն իրականացնելու պատրաստակամության համար Բելառուսի Հանրապետության սպորտի և տուրիզմի հարցերի նախարար Ալեքսանդր Շամկոյին պարգևատրել է Հայաստանի Հանրապետության սպորտի և երիտասարդության հարցերի նախարարության հուշանվերով:

Նախարարը եղել է Բելառուսի մարզական մի քանի կազմակերպություններում և կառույցներում, մասնավորապես՝ Բելառուսի օլիմպիական հերթափոխի պետական մարզական ուսումնարանում, ծանոթացել աշխատանքի կազմակերպման գործընթացներին:

Սպորտի և երիտասարդության հարցերի նախարար Գաբրիել Ղազարյանը Բելառուսի Հանրապետության փոխվարչապետ Նատալյա Կոչանովայի ու Բելառուսի Հանրապետության սպորտի և տուրիզմի նախարար Ալեքսանդր Շամկոյի հետ միասին մասնակցել է պատանիների և երիտասարդների բիաթլոնի աշխարհի առաջնության բացման հանդիսավոր արարողությանը: