ԲՀԿ-ի հայտարարությամբ հնարավոր եղավ խուսափել ներքաղաքական ցնցումներից

Ազգային ժողովի ՀՀԿ խմբակցության պատգամավոր Լևոն Մարտիրոսյանը ողջունում է փետրվարի 20-ին Ազատության հրապարակում նախատեսված հանրահավաքը չեղյալ համարելու ԲՀԿ-ի որոշումը: Փետրվարի 19-ին լրագրողների հետ հանդիպմանը պատգամավորը նշեց, որ Հայաստանը ժողովրդավարական երկիր է, և այդ առումով ողջունելի է այն, ինչ տեղի ունեցավ:

«Ես այն կարծիքին եմ, որ այն ինչ տեղի ունեցավ, ժողովրդավարության առումով ողջունելի է: Ողջունելի է այն, որ քաղաքական գործիչները, քաղաքական ուժերի ղեկավարները հարգում են իրենց ընտրողներին, գիտակցում են, որ պատասխանատվություն ունեն իրենց ընտրողների առջև: Երկրի ներքաղաքական կյանքում տեղի ունեցածը հենց սրա վկայությունն էր: Ես ժողովրդին կոչ եմ անում չհիասթափվել նման բաներից: Քաղաքականությունը շատ հետաքրքիր շրջադարձներ է ունենում, և նման բաներից պետք չէ հիասթափվել, այլ հարկավոր է նման իրավիճակներում սթափ դատել»,- «Արմենպրես»-ի հաղորդմամբ՝ նշեց Մարտիրոսյանը:

Պատգամավորը նաև նշեց, որ բարձր է գնահատում ՀՀԿ խորհրդի նիստի ավարտից հետո ՀՀ Նախագահ Սերժ Սարգսյանի ելույթը, որում նա խիստ քննադատության էր ենթարկել ԲՀԿ առաջնորդ Գագիկ Ծառուկյանին: «Ես լիովին համաձայն եմ հանրապետության Նախագահի ելույթի հետ, մանավանդ այն մասով, որ քաղաքականություն մեջ փողը որոշիչ դեր չի կարող ունենալ, իսկ քաղաքական դաշտը պետք է մաքրել տգիտությունից և անգրագիտությունից»,- եզրափակեց Մարտիրոսյանը:

ԱԺ նախկին պատգամավոր Վարդան Խաչատրյանն էլ այն կարծիքին է, որ ԲՀԿ-ի երեկվա հայտարարությամբ կարծես թե հնարավոր եղավ խուսափել երկրում ներքաղաքական հնարավոր լարվածությունից և ցնցումներից: «Սակայն ես չեմ կարող ասել, որ սա հանգուցալուծում էր: Երկրում առկա են բազմաթիվ խնդիրներ, և այնպես չէ, որ այս ներքին լարված իրավիճակը հենց այնպես էր առաջ եկել: Հասարակության մոտ դժգոհություն կա, և եթե առաջիկայում իշխանությունները չկարողանան հասարակությանը հուզող խնդիրներին լուծում տալ, կարծում եմ, մենք կրկին նման իրավիճակի առջև ենք կանգնելու»,- ասաց Խաչատրյանը:

«Բարգավաճ Հայաստան» կուսակցությունը հայտարարություն է տարածել, որում տեղեկացրել է, որ չեղյալ է համարում փետրվարի 20-ին Ազատության հրապարակում նախատեսված հանրահավաքը: Հայտարարություն է տարածել նաև ԲՀԿ նախագահ Գագիկ Ծառուկյանը' նշելով, որ Հայաստանում առկա խնդիրները լուծելու համար մեզ անհրաժեշտ է ոչ թե պատերազմել միմյանց դեմ, այլ հանգիստ, առանց միմյանց վիրավորելու աշխատել, ցույց տալ առկա բոլոր բացերը, գտնել լուծումներ և կյանքի կոչել դրանք: