NASA-ն ցուցադրել է Պլուտոնի Նիկտա և Հիդրա արբանյակների լուսանկարները

NASA-ն ցուցադրել է Նիկտայի և Հիդրայի՝ Պլուտոնի արբանյակների լուսանկարները, տեղեկացնում է «Արմենպրես»-ը: Արբանյակների լուսանկարներն ստացել է New Horizons ապարատը հունվարի 27-ից մինչև փետրվարի 8-ն ընկած ժամանամիջոցում: Այդ ընթացքում ապարատը Պլուտոնին է մոտեցել 201 միլիոնից մինչև 186 միլիոն կիլմետր հեռավորությամբ:

2015 թվականի հուլիսի 14-ին NASA-ի New Horizons միջմոլորակային ավտոմատ կայանը Պլուտոնին կմոտենա նվազագույն հեռավորությամբ՝ 12,5 հազար կիլոմետր: New Horizons ծրագրի հիմնական խնդիրը թզուկ մոլորակի և դրա արբանյակի ուսումնասիրումն է:

Նիկտան և Հիդրան հայտնաբերվել են 2005 թվականին Hubble աստղադիտակի միջոցով: Ընդամենը հայտնի է Պլուտոնի հինգ բնական արբանյակ: Դրանցից ամենամեծը Խարոնն է: Մյուս երկուսն են՝ Քերբերը և Սթիքսը:

Հիդրան Պլուտոնի շուրջը պտտվում է 38 օր պարբերությամբ և գտնվում է դրանից 64,7 հազար կիլոմետր հեռավորության վրա: Նիքսն ունի պտտման 25 օր պարբերություն և թզուկ մոլորակից հեռու է 48,7 հազար կիլոմետր: Պլուտոնի լուսիններից յուրաքանչյուրի տրամագիծը կազմում է մոտավորապես 40 – 150 կիլոմետր: