Րաֆֆի Հովհաննիսյանը բացակա չստացավ և խոստացավ միշտ լինել ժողովրդի կողքին

«Ժառանգություն» կուսակցության առաջնորդ Րաֆֆի Հովհաննիսյանը պահեց իր խոստումը և, անսալով իրեն բացակա չդնելու կոչին, փետրվարի 20-ին Ազատության հրապարակում հանդիպեց քաղաքացիների և լրագրողների հետ: Ազատության հրապարակը թեև մարդաշատ չէր, սակայն գտնվել էին քաղաքացիներ, ովքեր, հավատալով Րաֆֆի Հովհաննիսյանին, եկել էին նրա խոսքը լսելու:

«Ժառանգության» առաջնորդն իր խոսքը սկսեց Ազատության հրապարակ եկած քաղաքացիներին և լրագրողներին, ինչպես նաև կարգն ապահովող ոստիկաններին ողջունելով և ներկա լինելու համար շնորհակալություն հայտնելով: Այնուհետև Րաֆֆի Հովհաննիսյանը հայտարարեց, որ հայ ժողուրդը պարզ արդարություն է ուզում, իր հայրենիքում ապրելու, շնչելու, հեռանկար ունենալու հնարավորություն է ուզում, այլ ոչ թե խաղեր: «Մեր շարքային քաղաքացին ոչ քաղաքական, ոչ քաղաքացիական, ոչ մի տեսակի խաղեր չի ուզում»,- շեշտեց նա:

Րաֆֆի Հովհաննիսյանը խոսեց նաև միասնականության անհրաժեշտության մասին՝ ցավով նշելով, որ միասնականությունը, որը պետք է կայանար փետրավարի 20-ին, չկայացավ: «Եթե այսօր, այս ժամին, այս փաթիլների ներքո մենք միասին լինեինք, կլիներ նոր Հայաստան, սակայն ինչ-որ մեկը չուզեց դա: Մենք հարգում ենք բոլոր-բոլորին»,- ասաց նա՝ վստահեցնելով, որ «Ժառանգություն» կուսակցությունն, անկախ ամեն ինչից, գործելու է ժողովրդի համար:

«Ժառանգության» առաջնորդը հավաքվածներին հայտնեց, որ անցած կիրակին իր համար հինաալի օր էր, քանի որ այդ օրն առաջին անգամ եռյակի համագործակցությունը վերջապես կոնսենսուսով պսակվեց: «Այդ օրը մենք իրար աչքերի նայեցինք, ձեռք մեկնեցինք, միմյանց սխալները ներեցինք և ասացինք, որ ժողովուրդը պահանջում է միասնություն: Մենք պայմանավորվեցինք, որ փետրվարի 20-ին պետք է հավաքվենք այստեղ, այս ժամին: Մնացածը չեմ մեկնաբանում և ուզում եմ հայտնել բոլորին, որ իմ մոտ որևէ չարություն չկա: Ուղղակի ցանկանում եմ, որ դուք էլ իմանաք, որ անցած կիրակին ինձ համար հրաշալի օր էր: Այդ օրը ես զգացի, որ տարբեր հայ տղամարդիկ՝ մեկը հարուստ, մեկն' առաջին նախագահ, մեկը' Սփյուռքից վերադարձած հայ, կարող են ձեռք մեկնել և ասել, որ ժողովուրդն արժանի է ավելի լավին»,- նշեց Հովհաննիսյանը:

Ազատության հրապարակում հավաքված քաղաքացիներին Հովհաննիսյանը հայտնեց նաև «Ժառանգության» առաջիկա քայլերը: Նա տեղեկացրեց, որ իրենք հանդիպելու են քաղաքական ուժերի, քաղաքացիական հասարակության ներկայացուցիչների, ազատամարտիկների, մտավորականների, երիտասարդների, բոլորի հետ, ովքեր ոչ թե խոսում ու հետո գնում են սրճարան կամ կարաոկե, այլ պատրաստ են պայքարել հանուն հայրենիքի: «Վաղը ես և իմ ընկերները, եթե ցանկանում եք նաև դուք, կլինենք Գյումրիում՝ գլուխ խոնարհելու Ավետիսյանների ընտանիքի, Գյումրիի, Շիրակ աշխարհի արժանապատվության առջև: Իսկ ուրբաթ օրը, փետրվարի 27-ին կհավաքվենք այստեղ՝ հերթական ասուլիս-հանդիպումը ձեզ հետ կազմակերպելու համար»,- հայտնեց Հովհաննիսյանը:

Եզրափակելով ելույթը՝ Րաֆֆի Հովհաննիսյանը խոսեց միասնական լինելու անհրաժեշտության մասին՝ ընդգծելով, որ որևէ մեկը միայնակ չի կարող ոչինչ անել: Նա նաև վստահեցրեց, որ իրեն չի հետաքրքրում, թե ով է լինելու Հայաստանի հաջորդ նախագահը՝ ընդգծելով, որ դա հաստատ ինքը չի լինելու. Րաֆֆի Հովհաննիսյանի միակ ցանկությունն այն է, որ Հայաստանը կուսակցապետության չվերածվի:

Ավելի վաղ, «Ժառանգություն» կուսակցության առաջնորդ Րաֆֆի Հովհաննիսյանը հայտարարել էր, որ հանրությանը հուզող բոլոր հարցերին կպատասխանի փետրվարի 20-ին Ազատության հրապարակում: Թեև «Բարգավաճ Հայաստան» կուսակցությունը չեղյալ էր հայտարարել փետրվարի 20-ին Ազատության հրապարակում նախատեսված հանրահավաքը, Րաֆֆի Հովհաննիսյանը կոչ էր արել իրեն բացակա չդնել, քանի որ ինքն այդ օրը լինելու է հրապարակում և պատասխանելու է բոլոր հարցերին: