Orange Հիմնադրամը հյուրընկալել և կրթաթոշակներ է տրամադրել Հայաստանի 10 համալսարանների 100 ուսանողների

Հայաստանի համալսարանների հետ համագործակցության շրջանակներում՝ այսօր Orange Հիմնադրամն Orange-ի գլխամասային գրասենյակում հյուրընկալել է Երևանի, Գավառի, Գորիսի, Գյումրու, Իջևանի, Կապանի, Վանաձորի և Եղեգնաձորի համալսարանների բարձր առաջադիմություն ունեցող 100 ուսանողների: Միջոցառման ընթացքում ուսանողներն Orange Հիմնադրամից ստացան կրթաթոշակներ, ինչպես նաև մասնակցեցին Օրանժ Արմենիա ընկերության Մարդկային ռեսուրսների կառավարման մասնագետի կողմից «Ինչպես ընտրել մասնագիտություն և հաջողությամբ անցնել աշխատանքային հարցազրույցը» թեմայով կազմակերպված հատուկ սեմինարին: Հանդիպման ընթացքում ուսանողները հնարավորություն ունեցան նաև ծանոթանալ ընկերության գործունեությանը և իրենց հետաքրքրող հարցերն ուղղել Օրանժ Արմենիայի գլխավոր տնօրեն և Orange Հիմնադրամի խորհրդի նախագահ Ֆրանսիս Ժելիբտերին, ով ներկայացրեց հեռահաղորդակցության միջազգային ընկերության հիմնական մարտահրավերներն ու գործունեության առավելությունները, ինչպես նաև ընկերության` սոցիալական պատասխանատվության սկզբունքները:

«Մեզ համար արդեն բարի ավանդույթ է դարձել բարձրագույն կրթություն ստանալու հարցում ուսանողներին աջակցելը: Արդեն չորս տարի է, ինչ սոցիալական ծրագրերի շրջանակներում կրթաթոշակներ ենք տրամադրում ուսանողներին՝ նպատակ ունենալով թեթևացնել նրանց ընտանիքների ֆինանսական բեռը և նպաստել ինչպես Երևանի, այնպես էլ մարզային համալսարաններում սովորող երիտասարդների հետագա մասնագիտական զարգացմանը: Կարծում ենք նաև, որ մեր այսօրվա հանդիպում-սեմինարը կօգնի ուսանողներին ընտրել իրենց մասնագիտական ներուժն ապագայում լիարժեքորեն դրսևորելու համար անհրաժեշտ ուղիները», - ասաց Orange Հիմնադրամի խորհրդի նախագահ Ֆրանսիս Ժելիբտերը:

Orange-ի և Հայաստանի համալսարանների միջև համագործակցությունը սակայն շատ ավելի խորն ու համապարփակ է. 2011 թվականից ի վեր` Օրանժ Արմենիայում մասնագիտական պրակտիկա է անցել շուրջ 200 ուսանող: Այս ընթացքում Orange Հիմնադրամը կրթաթոշակներ է տրամադրել ավելի քան 350 ուսանողների:

Կրթաթոշակառու ուսանողների ընտրությունը կատարվել է վերջիններիս դիմումների հիման վրա՝ հաշվի առնելով ուսանողի ուսումնական առաջադիմությունը և ընտանիքի ֆինանսական դրությունը: Այս համագործակցության շրջանակներում կրթաթոշակներ են տրամադրվում Երևանի պետական համալսարանի (ԵՊՀ), Հայաստանում ֆրանսիական համալսարանի, Հայաստանի ազգային պոլիտեխնիկական համալսարանի, Գորիսի և Գավառի պետական համալսարանների, Պոլիտեխնիկական համալսարանի Գյումրու, Վանաձորի և Կապանի մասնաճյուղերի, ԵՊՀ-ի Իջևանի մասնաճյուղի և Հայաստանի տնտեսագիտական համալսարանի Եղեգնաձորի մասնաճյուղի ուսանողներին: