Բուխարեստում հարգել են Սումգայիթի, Բաքվի, Կիրովաբադի և Մարաղայի ջարդերի նահատակների հիշատակը

Ռումինիայի Հայոց թեմի, Ռումինիայի Հայոց միության և Ռումինիայում Հայաստանի դեսպանության համատեղ կազմակերպմամբ Բուխարեստի Հայոց կենտրոնում մարտի 15-ին կազմակերպվեց հիշատակի միջոցառում՝ նվիրված Հայ հերոսներին և նահատակներին: Բուխարեստի Միքայել և Գաբրիել Սուրբ Հրեշտակապետաց եկեղեցում Սումգայիթի, Բաքվի, Կիրովաբադի և Մարաղայի ողբերգությունների նահատակների հիշատակին մատուցված հոգեհանգստի կարգից հետո ծաղկեպսակներ զետեղվեցին եկեղեցու բակում գտնվող խաչքար-հուշակոթողին և Զորավար Անդրանիկի արձանին, որ կանգնեցվել է 1936թ. և համարվում է Զորավարին նվիրված աշխարհում առաջին հուշարձաններից մեկը:

Ինչպես հաղորդում է «Արմենպրես»-ի թղթակիցը Բուխարեստից, անուհետև Հայոց կենտրոնում տեղի ունեցավ բանախոսություն՝ նվիրված Զորավար Անդրանիկի 150-ամյա հոբելյանին: Զորավարի կյանքն ու գործունեությունը ներկայացրեցին ռումինահայ Արարատ հանդեսի գլխավոր խմբագիր Միհայ Ստեփան Գազազյանը և պատմաբան Էդուարդ Անտոնյանը: Ելույթներով հանդես եկան Ռումինիայում ՀՀ դեսպան Համլետ Գասպարյանը և Ռումինիայի Հայոց Թեմի առաջնորդ Տաթև Եպիսկոպոս Հակոբյանը, ովքեր իրենց խոսքում կոչ արեցին անցյալի և այսօրվա հերոսների օրինակով տեր կանգնել Հայրենիքին և համախմբվել ազգային նպատակների շուրջ: Միջոցառմանը մասնակցում էին և իրենց ուղերձն ասացին նաև Բուխարեստում գտնվող հայ խաղաղապահ առաքելության ներկայացուցիչներ: Միջոցառման ավարտին ցուցադրվեց Զորավար Անդրանիկի մասին պատմող վավերագրական ֆիլմ: