Ադրբեջանում ձերբակալված իրավապաշտպանը կտրել է երակները

Ադրբեջանում ձերբակալված իրավապաշտպան Թալեհ Խասմամեդովը հայտնվել է արդարադատության նախարարության բուժհաստատությունում: Դա պատահել է այն բանից հետո, երբ նա կտրել է երակները:

Ինչպես հաղորդում է «Արմենպրես»-ը, Խասմամեդովի հարազատները «Թուրան» լրատվական գործակալությանը հայտնել են, որ 10 օր առաջ, ի բողոք իր դեմ բացված քրեական գործի կեղծվածության, նա հացադուլ էր սկսել Գյանջայի քրեակատարողական հիմնարկի մեկուսարանում:Վեց օր անց նրան տեղափոխել էին Բաքվի Մաշտաղայի հոգեբուժարան: Մարտի 15-ին Խասմամեդովը կտրել է երակները, որից հետո նրան տեղափոխել են արդարադատության նախարարության հիվանդանոց:

Մինչ այդ միջադեպը, 10 օր նրան թույլ չեն տվել հեռախոով շփվել հարազատների հետ, և միայն երեկ է նա կարողացել հարազատներին հայտնել կատարվածի մասին: Ներկա դրությամբ' քննիչի ցուցումով նրան թույլ չեն տալիս տեսակցել հարազատների հետ:

Թ.Խասմամեդովը խուլիգանության մեղադրանքով ձերբակալվել էր փետրվարի 24-ին:

Բաքվի քրեկատարողական ծառայությունում հրաժարվել են միջադեպի հետ կապված մեկնաբանություն տալ «Թուրան»-ին: Գործակալությանը չի հաջողվել մեկնաբանություն ստանալ նաև Ադրբեջանի արդարադատության նախարարության Գլխավոր բժշկական վարչությունում:

Թ.Խասմամեդովը հայտնի է Ադրբեջանի Գյոյչա-Ուջար տարածաշրջանում իր իրավապաշտպան գործունեությամբ և Facebook-ում տեղական իշխանությունների հասցեին քննադատությամբ: Նախկինում նա դատապարտվել է իր իրավապաշտպան գործունեության համար, բայց երկու տարի առաջ ներում է ստացել և ազատ արձակվել բանտից:

Ադրբեջանում կեղծ մեղադրանքներով տասնյակ իրավապաշտպաններ կան ձերբակալված: Միջազգային իրավապաշտպան կազմակերպությունները նշում են, որ ներկայում Ադրբեջանում կա մոտ 100 քաղաքական բանտարկյալներ, նրանցից 23-ը ճանաչվել են խղճի բանտարկյալ: