Նեմցովի սպանությունը հանգեցրել է Ռուսաստանի ամենաազդեցիկ կլանների առճակատմանը. Foreign Policy

Մոսկվայի կենտրոնում ռուս ընդդիմադիր քաղաքական գործիչ Բորիս Նեմցովի քաղաքական սպանությունը հանգեցրել է Ռուսաստանի երկու «ամենաազդեցիկ կլանների» առճակատմանը, գրում է Foreign Policy-ն:

Ինչպես նշում է թերթը, ընդդիմադիր քաղաքական գործչի սպանության կասկածյալների ձերբակալությունը մի շարք ենթադրություններ է առաջացրել ռուսական քաղաքական էլիտայի ներսում «տարաձայնությունների» վերաբերյալ: Մի կողմից, իբր, գտնվում է Չեչնիայի ղեկավար Ռամզան Կադիրովը, իսկ մյուս կողմից՝ Մոսկվայում իրավապահ մարմինների բարձրաստիճան աշխատակիցների ինչ-որ «շրջանակ», որը վաղուց «դժգոհ է» Կադիրովի գործողություններից այն ոլորտներում, որոնք նրանք իրենցն են համարում:

Մինչ վերջերս, ռուսական ոստիկանությունը և Անվտանգության դաշնային ծառայությունը մտադրություն չեն ունեցել կարգի հրավիրել Կադիրովի աջակիցներին, իսկ այժմ ամեն ինչ մի վայրկյանում փոխվել է, նշված է հոդվածում:

Թերթը գրում է, որ Ռուսաստանի նախագահ Վլադիմիր Պուտինը «լուրջ երկընտրանքի» առաջ է կանգնել, քանի որ նրա համար կարևոր են և՛ հատուկ ծառայությունների, և՛ Կադիրովի հետ հարաբերությունները: