Վիկտոր Յանուկովիչը ներկա է եղել որդու հուղարկավորությանը Սևաստոպոլում

Ուկրաինայի նախկին նախագահ Վիկտոր Յանուկովիչը ներկա է եղել որդու՝ Վիկտորի հուղարկավորությանը Սևաստոպոլում: Այս մասին, ինչպես տեղեկացնում է «Արմենպրես»-ը, հաղորդել է «Ղրիմինֆորմը»՝ վկայակոչելով Սվյատո-Նիկոլսկի տաճարի սպասավորներից մեկին:

«Հուղարկավորման կարգին ներկա էին հարազատները, այդ թվում (Վիկտոր) Յանուկովիչը: Կինը, դատելով ըստ ամենայնի, մայրը, սաստիկ լալիս էր: Ներկա էր նաև մի փոքր տղա, հավանաբար որդին, և մի քանի մարդ, ամենայն հավանականությամբ՝ հարազատներ»,- ասել է նա:

Սպասավորի խոսքով՝ Յանուկովիչ Կրտսերի դին Եղբայրական հուշագերեզմանատան տաճար է բերվել մարտի լույս 23-ի գիշերը, ըստ որում թաղման ժամերգությունը տևել է մինչև առավոտ: Հարազատները հուղարկավորման ծեսին ժամանել են արդեն ցերեկը: Տաճարի սպասավորը հավելել է, որ բազմաթիվ պահապան զինվորներ թաղման ժամանակ ոչ մեկին թույլ չեն տվել մտնել գերեզմանատուն:

Մինչդեռ Սևաստոպոլի Նախիմովսկի շրջանի վարչակազմի աշխատակիցն «Ինտերֆաքս»-ին պատմել է, որ Յանուկովիչ Կրտսերի հուղարկավորությունը Սևաստոպոլի զինվորական հուշագերեզմանատանը կայացել է կեսօրին մոտ: «Արարողության մասնակիցների մի մասին գերեզմանատուն են բերել մգացված ապակիներով 20 ավտոմոբիլներով»,- ասել է նա:

Մարտի 22-ին տեղեկատվություն էր ստացվել Բայկալ լճում դժբախտ պատահարի հետևանքով Վիկտոր Յանուկովիչի կրտսեր որդու զոհվելու մասին. Volkswagen-ը, որի ղեկին եղել է Յանուկովիչ Կրտսերը, ընթացել է սառցի վրայով, այն չի դիմացել, և ավտոմոբիլն ընկել էջուրը: Ավտոմեքենայում եղել է յոթ մարդ, բոլորը, բացի վարորդից, կարողացել են դուրս գալ ավտոմեքենայից: