Apple-ի համահիմնադիրն արհեստական ինտելեկտն սպառնալիք է համարել մարդկության համար

Apple-ի համահիմնադիր Սթիվեն Վոզնյակը հայտարարել է մարդկության համար այն պոտենցիալ սպառնալիքի մասին, որը կապված է արհեստական ինտելեկտի զարգացման հետ: Այս մասին, ինչպես տեղեկացնում է «Արմենպրես»-ը, գյուտարարը և գործարարը հայտարարել է ավստրալական Financial Review թերթում հրապարակված հարցազրույցում:

Վոզնյակը պարզաբանել է, որ արհեստական ինտելեկտը, որը կարողանար ընդօրինակել մարդկանց մտածողության կրեատիվությունը, այնպիսի մի ուժ է ներկայացնում, որի դեմ ստիպված ենք պայքարել:

«Ես համաձայն եմ (բրիտանացի տեսաբան ֆիզիկոս) Սթիվեն Հոքինգի և (SpaceX-ի, Tesla Motors-ի և PayPal-ի հիմնադիր) Էլոն Մասքի հետ, որոնք հայտարարել են, որ մարդկությանը մռայլ ապագա է սպասում: Վաղ թե ուշ մարդու նման մտածող սարքերը, որոնք մտածված են մեր կյանքը թեթևանցնելու համար, կսկսեն հասկանալ, որ իրենք ավելի լավն են: Այդ ժամանակ ովքեր կսկսեն ղեկավարել ընկերությունները՝ դանդաղկոտ մարդը, թե՞ մեքենաները»,- ասել է Վոզնյակը:

Նա նշել է, որ մտածող մեքենաների համեմատությամբ իրեն պարզագույն էակ է տեսնում: «Կդառնա՞նք մենք արդյոք աստվածներ, թե, ընդհակառակը, կզբաղեցնենք ընտանի կենդանիների տեղը: Կամ կիջնենք մի քանի աստիճանով ցած՝ արհեստական ինտելեկտների համար վերածվելով մրջյունների նման ինչ-որ բանի: Ես ստույգ չգիտեմ»,- հավելել է Apple-ի համահիմնադիրը:

Ավելի վաղ արհեստական ինտելեկտի զարգացման սպառնալիքի մասին հայտարարել է Microsoft-ի հիմնադիր Բիլ Գեյթսը: Այս հարցում նա կողմնակից է Մասքի տեսակետին: Դա այն է, որ մեքենաներն անհրաժեշտ է սահմանափակել՝ դրանց չտրամադրելով զարգացման լիակատար ազատություն: