Վրաստանում առավել մեծ համակրանք են վայելում նախագահ Մարգվելաշվիլին և առողջապահության նախարարը

Վրաստանի նախագահ Գեորգի Մարգվելաշվիլին և աշխատանքի, առողջապահության և սոցիալական պաշտպանության նախարար Դավիթ Սերգեենկոն, Միջազգային հանրապետական ինստիտուտի (IRI) կողմից անցկացված հարցման համաձայն, առավել մեծ ժողովրդականություն են վայելում երկրի քաղաքական գործիչների թվում, տեղեկացնում Է «Արմենպրես»-ը՝ հղում անելով «Նովոստի Գրուզիա»-ին:

Ըստ սոցիոլոգիական հետազոտության արդյունքների, որոնք «Ռուսթավի-2» հեռուստաընկերությունը հրապարակել Է մարտի 24-ին, Սերգեենկոյի և Մարգվելաշվիլիի նկատմամբ իրենց համակրանքն են հայտնել հարցման մասնակիցների ընդհանուր թվի 62 տոկոսը: Երկրորդ տեղը (57 տոկոս) բաժանել են Վրաստանի պաշտպանության նախկին նախարար, «Մեր Վրաստանը. ազատ դեմոկրատներ» կուսակցության առաջնորդ Իրակլի Ալասանիան և Վրաստանի խորհրդարանի նախագահ, «Վրացական երազանք» կառավարող կոալիցիայի մեջ մտնող Հանրապետական կուսակցության անդամ Դավիթ Ուսուպաշվիլին:

Երկրի վարչապետ Իրակլի Ղարիբաշվիլին զբաղեցրել Է երրորդ տեղը: Պարզվել Է, որ նրա նկատմամբ բարյացակամ վերաբերմունք ունի հարցվածների 56 տոկոսը: Նրան հաջորդում Է Վրաստանի փոխվարչապետ, Էներգետիկայի նախարար Կախա Կալաձեն (48 տոկոս):

Հետ չի մնում նաև Վրաստանի խորհրդարանի նախկին նախագահ, «Միասնական ազգային շարժում» նախկին կառավարող կուսակցության առաջնորդներից մեկը՝ Դավիդ Բաքրաձեն, որի նկատմամբ համակրանք Է տածում հարցման մասնակիցների 47 տոկոսը: Թբիլիսիի քաղաքապետ Դավիթ Նարմանիայի համակիրները կազմում են 40 տոկոս:

«Միավորված դեմոկրատական շարժում» կուսակցության առաջնորդ, խորհրդարանի նախկին խոսնակ Նինո Բուրջանաձեի, ինչպես նաև «Հայրենասերների դաշինքի» առաջնորդներից մեկի՝ Իռմա Ինաշվիլիի նկատմամբ առավել բարեհաճ են 28-ական տոկոս հարցվածներ: