Էբոլա վիրուսի դեմ երկու պատվաստանյութեր անվտանգ են ճանաչվել մարդկանց համար

Էբոլա վիրուսի հարուցած հիվանդության դեմ երկու պատվաստանյութերի կլինիկական փորձարկումները ցույց են տվել, որ պատրաստուկներն անվտանգ են մարդկանց համար: Այդ մասին, ինչպես տեղեկացնում է «Արմենպրես»-ը, մարտի 27-ին հայտնել է ԱՄՆ-ի Առողջապահության ազգային ինստիտուտը: Նրա տվյալներով՝ խոսքը վերաբերում է GlaxoSmithKline բրիտանական ընկերության և NewLink Genetics ամերիկյան կորպորացիայի պատրաստուկներին:

Պատվաստանյութերի անվտանգությունն ու արդյունավետությունն ստուգելու նպատակով անցկացված փորձարկումները կատարվել են Լիբերիայում, դրանց մասնակցել է ավելի քան 600 մարդ:

«Մենք շնորհակալ ենք այն լիբերիացիներին, որոնք հրավիրվել էին մասնակցելու այդ կարևոր կլինիկական հետազոտություններին, դրանց արդյունքները ոգեշնչում են,- ասել է ԱՄՆ-ի ալերգիկ և ինֆեկցիոն հիվանդությունների ազգային ինստիտուտի տնօրեն Էնթոնի Ֆաուչին:- Այժմ մենք պետք է առաջ շարժվենք, ընդլայնենք հետազոտության շրջանակները՝ պարզելու՝ կարող են արդյոք այդ փորձարարական պատվաստանյութերը պաշտպանել Էբոլայից և հնարավոր կլինի արդյոք դրանք օգտագործել այդ հիվանդության բռնկման դեմ պայքարելու համար»:

Ինչպես նշում է ՏԱՍՍ-ը, մինչև ապրիլի վերջը պլանավորվում է Լիբերիայի մայրաքաղաք Մոնրովիայի հիվանդանոցներում պատվաստանյութը փորձարկել ևս 1,5 հազար հիվանդների վրա: Փորձարկումները կշարունակվեն այս տարի ավելի ուշ: Դրանց, ինչպես սպասվում է, կմասնակցեն ևս մոտավորապես 27 հազար լիբերիացիներ:

Առողջապահության համաշխարհային կազմակերպության տվյալներով՝ Էբոլա տենդի համաճարակի սկսվելուց հետո Գվինեայում, Լիբերիայում և Սիեռա Լեոնեում մահացել է 10,3 հազար մարդ, վարակվել են շուրջ 25 հազար բնակիչներ: