ՌԴ փոխվարչապետ Ռոգոզինը Բաքվում է

Ռուսաստանի Դաշնության վարչապետի առաջին տեղակալ Դմիտրի Ռոգոզինն անակնկալ այցով գտնվում է Բաքվում:

Ինչպես հաղորդում է «Արմենպրես»-ը' վկայակոչելով report.az լրատվական կայքը, այս մասին այսօր նա գրել է Facebook-ի իր էջում:

Ռուսաստանյան «Կոմերսանտ»-ը' հղում կատարելով զենքի արտահանման հետ կապված աղբյուրներին, հայտնում է, որ Ռոգոզինը Բաքվում պետք է հանդիպի Ադրբեջանի նախագահ Իլհամ Ալիևի հետ և քննարկի երկու երկրների միջև ռազմա-տեխնիկական համագործակցության հարցեր:

Թերթը հայտնում է, որ Ռոգոզինին զուգահեռ Բաքու կայցելեն նաև Ռուսաստանի «Ռոսօբորոնէքսպորտ» ընկերության, ինչպես նաև Ռազմա-տեխնիկական համագործակցության դաշնային ծառայության ղեկավարությունների ներկայացուցիչները:

Ըստ թերթի աղբյուրների' այցը «հատուկ բնույթ» է կրում և նախապես ծրագրված չի եղել: Որպես պատճառ նշվում է «արտահանման պայմանագրերի հետ կապված ստեղծված դժվարությունները բարձր մակարդակով լուծելու» անհրաժեշտությունը:

Ըստ report.az-ի' ենթադրվում է, որ տնտեսական ճգնաժամում հայտնված Ադրբեջանը չի կարողանում վճարել պատվիրած և արդեն մատակարարված տեխնիկայի դիմաց, և Ռոգոզինը Բաքու է այցելել այդ հարցը հարթելու համար:

Նշվում է, որ Ռոգոզինն ու նրա պատվիրակությունը նախ պետք է հանդիպեն Ադրբեջանի ՊՆ զինվորականների, փոխվարչապետ և Ռուսաստան-Ադրբեջան միջկառավարական հանձնաժողովի իր գործընկեր Յագուբ Էյուբովի, իսկ հետո՝ Ալիևի հետ: