Եվրահանձնաժողովը հավանության է արժանացրել TAP-ը

Եվրամիությունը հավանության է արժանացրել Հունաստանի կառավարության եւ Անդրադրիատիկ գազատար խողովակաշար (Trans Adriatic Pipeline AG - TAP) ձեռնարկության միջեւ ձեռք բերված համաձայնությանը' նշելով, որ այն համապատասխանում է Եվրամիության կանոններին, եւ այն ամենին, ինչ վերաբերվում է պետական օգնության ցուցաբերմանը:

Այս մասին, ինչպես հաղորդում է «Արմենպրես»-ը, հայտնում է «Ինտերֆաքս»-ը:

«Այդ նախագիծը կլավացնի ԵՄ անվտանգությունը եւ էներգետիկական մատակարարման դիվերսիֆիկացիան' չխախտելով ներքին շուկայում մրցակցության խախտման կանոնները», -ասվում է Եվրահանձնաժողովի այսօր տարածած պաշտոնական հաղորդագրությունում:

Որպես «Հարավային գազային միջանցք» նախագծի մաս Ադրբեջանի, Վրաստանի եւ Թուրքիայի տարածքով անցնելուց հետո Անդրանատոլիական գազատար խողովակաշարի (TANAP) շարունակություն TAP-ը կանցնի Հունաստանի, Ալբանիայի եւ Իտալիայի տարածքով: Նախատեսված է TANAP-ով արտահանել ադրբեջանական «Շահ Դենիզ» հանքավայրի գազը եւ TAP-ով հասցնել Եվրոպա' դրանով փոքրացնելով ռուսաստանյան գազից կախվածությունը: TAP-ում ներդրումների ծավալը նախատեսվում է 5,6 մլրդ եվրոյի սահմաններում, որից 2,3 մլրդ եվրոն' Հունաստանում:

Օրերս Բաքու այցելած ԵՄ գերագույն հանձնակատար Ֆեդերիկա Մոգերինին նշել էր, որ ԵՄ-ը, մասնավորապես, հետաքրքրված է Կասպից ծովից էներգառեսուրսների մատակարարմամբ, եւ այդ պատճառով ԵՄ-ն աջակցում է Հարավային գազային միջանցքի ստեղծմանը: