Անկարայում պայթյունն իրագործած կնոջ ինքնությունը պարզվել է

Անկարայի կենտրոնական Քըզըլայ հրապարակի կանգառում պայթած ավտոմեքենայում հայտնաբերված կնոջ մարմինը պատկանում է Բալիքեսիրի համալսարանի ուսանող Սեհեր Չաղլա Դեմիրին:

Այս մասին, ինչպես հաղորդում է «Արմենպրես»-ը, հայտնում են թուրքական ԶԼՄ-ները' հղում կատարելով Թուրքիայի ՆԳՆ-ին և Առողջապահության նախարարությանը: Կնոջ ինքնությունը պարզվել է նրա մատնահետքերի միջոցով:

Նախնական տվյլաներով՝ Սեհեր Չաղլա Դեմիրը մի տղամարդու հետ Անկարա է ժամանել 5 օր առաջ: Նրանց օգտագործած ավտոմեքենան 10 օր առաջ առևանգվել էր Ուրֆայում:

Նշվում է, որ ներկայում դատական գործ է ընթանում Սեհեր Չաղլա Դեմիրի և նրա 4 ընկերուհիների' Համիդայի, Քադերի, Սուեյա Սաքլըի և Եշիմ Աքյուրեքի նկատմամբ: Նրանք մեղադրվում են այն բանում, որ կապեր են ունեցել Թուրքիայում արգելված Քրդստանի աշխատավորական կուսակցության (PKK) հետ:

Ներկա դրությամբ Անկարայում ահաբեկչական պայթյունի հետևանքով մահացածների թիվը հասել է 37-ի: 125 մարդ վիրավորվել է, որոնցից 20-ի վիճակը ծայրահեղ ծանր է:

Թուրքիայի մայրաքաղաքում վերջին 5 ամսում սա 3-րդ ահաբեկչական պայթյունն է: Առաջին ահաբեկչական պայթյունը տեղի էր ունեցել անցյալ տարվա հոկտեմբերի 10-ին Անկարայի երկաթուղային կայարանի մոտ: Այն ժամանակ մահացել էին 109 քաղաքացիներ: Երկրորդ պայթյունն իրագործվել էր այս տարվա փետրվարի 17-ին, որը խլել էր 29 քաղաքացիների կյանք: