ԱՄՆ-ի Կոնգրեսը ցեղասպանություն է ճանաչել Մերձավոր Արևելքում քրիստոնյաների սպանությունները

ԱՄՆ-ի Կոնգրեսի Ներկայացուցիչների պալատը մարտի 14-ին պաշտպանել է բանաձևի այն նախագիծը, որը հորդորում է ԱՄՆ-ի և մյուս երկրների իշխանություններին՝ քրիստոնյաների սպանություններն ու նրանց նկատմամբ դաժան գործողությունները, մասնավորապես, Մերձավոր Արևելքում, ճանաչել ցեղասպանություն և հանցագործություններ մարդկության դեմ, տեղեկացնում է «Արմենպրես»-ը: Նախաձեռնությանը հավանություն են տվել 393 կոնգրեսականներ՝ երկրի երկու կուսակցություններից:

Կատարման համար ոչ պարտադիր փաստաթղթի հեղինակը Նեբրասկայի նահանգից հանրապետական Ջեֆ Ֆորտենբերին է: Տեքստի համաձայն՝ բոլոր կառավարություններն ու միջազգային կազմակերպությունները, այդ թվում՝ ՄԱԿ-ն ու նրա գլխավոր քարտուղարը, պետք է ոչ միայն ցեղասպանություն ճանաչեն քրիստոնյաների նկատմամբ կիրառվող բռնությունները, այլև դրանց վերաբերվեն որպես պատերազմական հանցագործությունների:

Բացի այդ, քաղաքական գործչի կարծիքով, ՄԱԿ-ի անդամները պետք է դիմեն արաբական երկրներին ու հորդորեն նրանց՝ տարածաշրջանային կամ միջազգային դատարաններ ստեղծել նման դեպքերը քննելու համար: Բանաձևի նախագծի կարևոր դրույթներից մեկում ընդգծվում է բոլոր այն անձանց ու խմբավորումների նկատմամբ պատժամիջոցների անհրաժեշտությունը, որոնց գործողությունները հանգեցրել են քրիստոնյաների հարկադրական վերաբնակմանը նրանց զբաղեցրած տարածքներից: Ինչպես նշվում է, հանցագործներին անհրաժեշտ է հետևել, ձերբակալել և ենթարկել օրենքով նախատեսված պատժի, հաղորդել է ՏԱՍՍ-ը: