Ես հայկական արմատներ չունեմ, բայց չեմ էլ հասկանում, թե դա ինչ կապ ունի. Ամալ Քլունի

Ադրբեջանցիները սոցիալական ցանցերում ակտիվ քննարկումներ են սկսվել, թե արդյոք հայկական արմատներ ունի՞ Ամալ Քլունին: Հայտնի փաստաբանի հայտարարությունից հետո, շրջանառության մեջ է դրվել անգամ պնդումը, թե Քլունին Խադիջա Իսմայիլովայի գործի մեջ ներգրավվում է «հայկական լոբբիստական ջանքերի շնորհիվ»։

«Ազատություն» ռադիոկայանի հետ զրույցում հայտնի իրավապաշտպան, փաստաբան Ամալ Քլունին հայտարարել է, որ հայկական արմատներ չունի:

Ադրբեջանի նախագահ Իլհամ Ալիևի ռեժիմի կողմնակիցները պարբերաբար հայտարարում են, որ Ամալ Քլունին ազգությամբ հայ է:

«Չեմ հասկանում, թե որևէ ազգության պատկանելն ինչպես կարող է վարկաբեկել ինձ: Ես հայկական արմատներ չունեմ, բայց չեմ էլ հասկանում, թե դա ինչ կապ ունի: Այն, որ ես Հայաստանի շահերը ներկայացրել եմ դատարանում, ինձ հայ չի դարձնում»,- ասել է Քլունին, որը Մարդու իրավունքների եվրոպական դատարանում Հայոց ցեղսպանության հետ կապված աղմակահարույց գործով ներկայացնում էր Հայաստանի շահերը:

Քլունիի դեմ ադրբեջանցիների հարձակումներն «Ազատություն» ռադիոկայանին ուղարկված նամակում դատապարտել է նաև լրագրող Խադիջա Իսմայիլովան, որը Ալիևի ռեժիմի կողմից երկար ժամանակ հետապնդումների ենթարկվելուց հետո դատապարտվել է 7 ու կես տարվա ազատազրկման, և որի շահերը նույնպես ՄԻԵԴ-ում պաշտպանում է Ամալ Քլունին:

«Ես Քլունիին ընտրել եմ, որովհետև գոհ եմ նրա պաշտպանությունից: Նրան չեմ հարցրել իր արմատների մասին, քանի որ քաղաքակիրթ աշխարհում նման հարցեր չեն տալիս»,- գրել է Իսմայիլովան:

Ադրբեջանական կողմին նման ենթադրությունների հիմք է տվել նաև այն, որ Քլունիի ամուսինը՝ հայտնի դերասան Ջորջ Քլունին, սատարում է հայ գործարարների ստեղծած «Հարյուր կյանք» հիմնադրամը, որին իր աջակցությունն է հայտնել նաև Ամալ Քլունին:

Մարտի 14-ին Քլունին Իսմայիլովայի անունից բողոք է ներկայացրել ՄԻԵԴ: