Պակիստանում առնվազն 15 մարդ է զոհվել ավտոբուսի պայթեցման հետևանքով

Առնվազն 15 պետական ծառայող է զոհվել Պակիստանի հյուսիսարևմտյան շրջանում ավտոբուսի պայթեցման հետևանքով: Այդ մասին, ինչպես տեղեկացնում է «Արմենպրես»-ը, հայտնել է Dawn տեղական թերթը՝ հղում անելով ոստիկանությանը:

«Տասնհինգ մարդ է զոհվել, ևս 25-ը՝ լուրջ վերքեր են ստացել»,- ոստիկանության ներկայացուցչի խոսքը մեջբերել է հրատարակությունը:

Միջադեպը տեղի է ունեցել մարտի 16-ն առավոտյան, երբ ավտոբուսը Մարդան քաղաքից ընթանում էր դեպի Հայբեր Պահթունհվա նահագի վարչական կենտրոն՝ Փեշավար: Ինչպես հրատարակությանը հայտնել է ոստիկանության ներկայացուցիչը, պայթուցիկ սարքը տեղադրված է եղել ավտոբուսի հետնամասում: ԶԼՄ-ները նաև հայտնում են, որ պայթյունի պահին ավտոբուսում կարող էին լինել 40-ից մինչև 50 մարդ:

Առայժմ տարածաշրջանում գործող ահաբեկչական կազմակերպություններից ոչ մեկը չի ստանձնել պայթյունի պատասխանատվությունը, հաղորդել է ՌԻԱ Նովոստին: