Ադրբեջանի բնակիչը Facebook-ում գրել է ինքնասպանություն գործելու մասին եւ կախվել

Աշխարհ 19 Օգոստոս, 2016 11:36

Ադրբեջանի Գուբայի շրջանի Խալթան գյուղի 55-ամյա բնակիչ Բայրամ Սեիդովը սեփական տանն ինքնասպանություն է գործել:

Ինչպես հաղորդում է APA լրատվական գործակալությունը, ինքնասպանություն գործելուց առաջ, նա այդ մասին գրել է Facebook-ի իր էջում: Հետո Սեիդովին հարազատները գտել են կախված:

Ինքնասպանության պատճառները հայտնի չեն: Բայրամ Սեիդովը երկար ժամանակ աշխատել էր ուսուցիչ եւ ներկայում անցել էր թոշակի:

Փաստի առնչությամբ Գուբայի շրջանային դատախազությունում հետաքննություն է անցկացվում:

Ադրբեջանական մամուլում հաճախակիացել են ինքնասպանությունների մասին տեղեկությունները: Սակայն Ադրբեջանում ինքնասպանությունների պաշտոնական վիճակագրություն չի տարվում: Մամուլի հրապարակումների հետազոտությունների համաձայն' ինքնասպանություններն Ադրբեջանում ավելի շատ տեղի են ունենում նյութական դժվարությունների պատճառով:

Ադրբեջանական ԶԼՄ-ների համաձայն' 2016 թվականի սկզբից մինչ այժմ Ադրբեջանում ինքնասպանության 236 դեպք, ինքնասպանության դիմելու 110 փորձ է գրանցվել: Ինքնահրկիզման փորձ է կատարել 16 մարդ, որից 14-ը մահվան ելքով ավարտ է ունեցել:

Հոգեբան Ազադ Իսազադեն ավելի վաղ հայտնել էր, որ ինքնասպանությունների մեծացած թվաքանակն Ադրբեջանում կապված է հասարակության մեջ ագրեսիայի աճով, ինչը խոսում է, ընդհանուր առմամբ, նրա դեգրադացիայի հետ: Բացի այդ, ընդգծվել էր, որ Ադրբեջանում ինքնասպանությունների թվի մեծացման պատճառը կապված է սոցիալ-տնտեսական իրավիճակի վատացման հետ: Մասնավորապես, այդ երկրում ինքնասպանությունները հաճախակիացել են վարկային պարտքերի պատճառով: