Արծվիկ Մինասյանը 267 հազար դոլարով եղջերու կբազմացնի

Այսօր՝ փետրվարի 10-ին ասուլիս էր հրավիրել Բնապահպանության նախարար Արծվիկ Մինասյանը, ով խոսելով ոլորտում իրականացվելիք ծրագրերի մասին, ասաց՝ ծրագրում են ստեղծել «Ջերմուկ» ազգային պարկ, Տաթևի տարածաշրջանային ազգային պարկ, որոնց հիմնական նպատակը զբոսաշրջության հետագա զարգացումն է: 

Հայաստանում ստեղծվելու է կովկասյան ազնվացեղ եղջերուների վերաբնակեցման ծրագիր, որն իր մեջ ներառում է Դիլիջանի ազգային պարկում եղջերուների բազմացման կենտրոնի ստեղծում, 4 արու և 11 էգ եղջերուի ձեռք բերում, իրականացվելու է նաև կենտրոնի աշխատակիցների ուսուցում, կենդանիների խնամք և բազմացում, այնուհետև նրանց ազատ արձակում բնություն և հետագա մոնիթորինգ:

««Ջերմուկ» ազգային պարկի ստեղծման համար կհատկացվի 5714.27 հազար դոլար, որը կիրականացնի «Լիդիան Արմենիա» ընկերությունը: Իսկ Տաթևի տարածաշրջանում ազգային պարկ ստեղծելու համար կհատկացվի 174.41 հազար ԱՄՆ դոլար, որը կիրականացվի Բնության համաշխարհային հիմնադրամի դրամաշնորհով: Դիլիջան ազգային պարկում կովկասյան ազնվացեղ եղջերուների վերաբնակեցման ծրագիրը կարժենա 267 հազար ԱՄՆ դոլար, իսկ կոնկրետ 2017 թվականին՝ կհատկացվի 80 հազար ԱՄՆ դոլար: Այն իրականացվելու է Կովկասի բնության հիմնադրամի դրամաշնորհով»,- նշեց նա:

Նախարարի խոսքով՝ 2017 թվականին իրենց նախարարությունն ընդհանուր առմամբ 25 ծրագիր է իրականացնելու, որոնք իրականացվելու են միայն դրամաշնորհային ծրագրերով, ոչ թե՝ վարկային: Ծրագրերի ընդհանուր արժեքը 184.5 մլն ԱՄՆ դոլար է:

Առհասարակ, բնապահպանության և բնօգտագործման վճարները կուղղվեն շրջակա միջավայրի բարելավման ծրագրերին՝ համայնքներում և տարածքներում իրականացնելով կոնկրետ ներդրումային ծրագրեր: 

«Այս ծրագրի համար անհրաժեշտ են որոշակի գումարներ, որոնք մենք կստանանք տարբեր գործիքների միջոցով:

Օրինակ՝ Համաշխարհային բանկի կողմից առաջարկվող՝ բնապահպանություն՝ պարտքի դիմաց, գործիքն է: Երբ երկու երկրների միջև կա պարտք, երկրները հանդես են գալիս հայտարարությամբ, որ պատրաստ են պարտքի մի մասը չեղարկել, եթե տվյալ երկրում իրականացվի շրջակա միջավայրի պահպանման ծրագրեր: Մենք ոչ թե ունենք կոնկրետ երկրներից առաջարկներ, այլ Համաշխարհային բանկը ներկայացրել է սա և առաջարկել նման գործիք կիրառել նաև Հայաստանում: Եթե X երկիրը արտաքին պարտք ունի Y երկրին և տվյալ երկիրն ունի կլիմայական տարբեր խնդիրներ, ապա Y երկիրը կարող է առաջարկել հրաժարվել, ներել կամ զիջել պարտքը՝ կոնկրետ ծրագրերի և արդյունքների դիմաց: Մենք հիմա որևէ կոնկրետ երկրից առաջարկ չունենք: Մենք քննարկումներ ենք իրականացնում Համաշխարհային բանկի հետ:

Կարևոր գործիք են նաև մասնավոր ներդրումները, որոնք մեր խորին համոզմամբ՝ արդյունավետորեն կարելի է ներգրավել ոլորտում: Մենք կոնկրետ 185 մլն դոլարի ներդրումային ծրագիր ունենք այս պահին: 2017-ին մենք արդեն ունենք 11,5 մլն դոլարի ներդրում»,- մանրամասնեց Մինասյանը:

Նրա խոսքով՝ չեն իրականացնում որևէ ծրագիր, որը ենթադրում է վարկային ռեսուրս, այլ օգտագործում են դրամաշնորհային ծրագրեր: «2017-ի համար նախատեսվում է տարեկան 580 տոննա CO 2-ի կրճատում, 35,6 կմ փողոցային լուսավորության էներգաարդյունավետ արդիականացում և այլն: Շուրջ 32 համայնքներում անցկացվելու են ծրագրեր և հատկացվելու են դրամաշնորհներ»,- ասաց նախարարը: