«Խոստումը» լույս է սփռում Հայոց ցեղասպանության վրա

Հոլիվուդյան մեծ բյուջե ունեցող «Խոստումը» հզոր պատերազմական դրաման, որի գործողությունները ծավալվում են Հայոց ցեղասպանության իրադարձությունների ֆոնին, լույս է սփռում պատմական փաստերի վրա: Այս մասին գրում է Russia Today-ը' ծավալուն հոդվածով անդրադառնալով երջանկահիշատակ Քըրք Քըրքորյանի նախաձեռնությամբ նկարահանված ֆիլմին, որի պրեմիերան ԱՄՆ-ում և Մեծ Բրիտանիայում կայացել է:

Ըստ պարբերականի ֆիլմի կարևոր հնարքներից մեկն այն է, որ գլխավոր դերակատարներից և ոչ մեկը հայ չէ:

«Այս ֆիլմը լույս է սփռում պատմության այն հատվածի վրա, որը մարդիկ փորձել են ջնջել», - պարբերականը մեջբերում է Օսկար Այզեքի խոսքը:

Ինչպես ասվում է հոդվածում, ֆիլմում պատմական իրողությունները ներկայացվում են գեղարվեստական սիրային պատմության միջոցով, որի հերոսներն են հայ բժիշկ-ուսանող Միքայելը, որին մարմնավորել է ամերիկացի Օսկար Այզեքը և երիտասարդ հայ նկարչուհի Անան, որին մարմնավորել է կանադուհի Շառլոտ Լը Բոնը: Սիրային եռանկյունու մյուս կողմում կանգնած է Անայի վաղեմի ընկերը' Թուրքիայում Associated Press-ի թղթակից Քրիսը, որին մարմնավորել է անգլիացի Քրիստիան Բեյլը:

Վերջինս էլ որպես լրագրող լուսաբանում է տեղի ունեցող իրադարձությունները, հայերի կոտորածներն ու տարհանումները:

Ֆիլմի կարգախոսներից է հաճախ հնչող արտահայտությունը. «Եթե դաս չես քաղում քո պատմությունից, քեզ վիճակված է կրկնել այն»:

Հիշեցնենք` գլխավոր դերակատարներն ու ռեժիսոր Թերի Ջորջը ֆիլմի մասին մի շարք հարցազրույցներ են տվել հեղինակավոր պարբերականներին: Իսկ սոցցանցերում մեծ համբավ ունեցող հանրահայտ դեմքեր շարունակում են աջակցել Ցեղասպանության մասին պատմող «Խոստումը» ֆիլմին և այն դիտելու կոչով հանդես գալիս:

Tert.am