Համբերություն, սեր գործի հանդեպ. Արաքս Մանսուրյանը տոնում է իր ստեղծագործական գործունեության 50-ամյակը

 Ճանաչված ու սիրված օպերային երգչուհի, Սիդնեյի օպերային թատրոնի մեներգչուհի, վոկալիստներ կրթող բարձրակարգ մանկավարժ Արաքս Մանսուրյանը տոնում է  իր ստեղծագործական գործունեության 50-ամյակը: Երգչուհին այն նշում է Հայաստանում իր հարազատների, գործընկերների, ընկերների շրջապատում: Այդ առթիվ, սեպտեմբերի 18-ին  Ալ. Սպենդիարյանի անվան օպերայի եւ բալետի ազգային ակադեմիական թատրոնում կկայանա երեկո, որի ընթացքում հանդիսատեսը հնարավորություն կունենա լսելու Արաքս Մանսուրյանի՝ Սիդնեյի կոնսերվատորիայի ուսանողներին:

Համերգային ծրագիրը բավական հագեցած է: Հնչելու է Կոմիտաս, Մանսուրյան, նախատեսված է եվրոպական ծրագիր: Արաքս Մանսուրյանին հանդիսատեսը կլսի վերջում: Նա հանդես կգա իր ուսանողների հետ:

Մինչ համերգը` առավոտյան փորձից հետո Արաքս Մանսուրյանն իր ուսանողների հետ շտապեց լրագրողների հետ հանդիպման «Արմենպրես»-ի մամուլի սրահում: Զրույցի ընթացքում իր ուսանողները նկատեցին, որ տիկին Մանսուրյանը Հայաստանում բոլորովին այլ է. այստեղ նա ավելի կենսախինդ է, ուրախ, զվարթ: Արդեն մամուլի ասուլիսին Արաքս Մանսուրյանը չթաքցրեց, որ Հայաստանում իրեն ավելի լավ է զգում, այստեղ զգացողությունները բոլորովին այլ են: Լրագրողները համառորեն փորձեցին ճշտել, թե արդյոք տիկին Մանսուրյանը չի պատրաստվում ընդմիշտ տեղափոխվել Հայաստան: Ի պատասխան` նա նշեց, որ ցանկությունը շատ մեծ է և արդեն մտածում է Երևանում իր բնակարանն ունենալու մասին:

«Իսկ այսօր առիթ է մեկ անգամ ևս դիտարկելու իմ անցած ուղին: Հայաստանում ապրած տարիներն ինձ հարազատ են, բայց ես հաջողություններ եմ ունեցել նաև դրսում, գնահատվել: Իհարկե, դա ես չեմ առանձնացնում, որովհետև ես այնտեղ մատուցում եմ մերը, այստեղի հողից ծնված գիտելիքը: Այն, ինչ արել եմ այստեղ, դրսում ավելի կատարյալ եմ դարձրել»,-ասաց Արաքս Մանսուրյանը:   

Շատ մեծ ոգևորությամբ է խոսում երիտասարդների հետ աշխատանքի մասին, հատկապես, երբ նրանց սովորեցնում է հայերեն երգել: Ինչպես Արաքս Մանսուրյանն ընդգծեց՝ դա շատ դժվար է, որովհետև նախ թարգմանելը, բացատրությունը ներկայացնելն է բարդ, դրանից բացի, գործ է ունենում տարբեր ազգի ներկայացուցիչների հետ, որոնց մշակույթը, մտածողությունը, լեզուն շատ տարբեր են:  

«Համբերություն, գործի հանդեպ սեր: Այդ ամենն են ինձ օգնել այդ գործում»,-ասաց Արաքս Մանսուրյանը:

Նույն հիացմունքով էլ Արաքս Մանսուրյանի մասին խոսում էին իր ուսանողները:  Ջորջիա Կոկորիսը հանդիպել է Արաքս Մանսուրյանին տարիներ առաջ, և արդեն 10 տարի է՝  նա իր ուսուցիչն է:

«Մեծ պատիվ է լինել Հայաստանում, երգել Կոմիտաս, Մանսուրյան: Արվեստի, հայոց լեզվի, հայ մշակույթի հանդեպ Արաքս Մանսուրյանի սերն այնքան մեծ է, որ մենք բոլորս վարակվում ենք: Սովորելու տարիներին անպայման ցանկանում ենք իմանալ հայերենի, հայ մշակույթի, պատմության մասին»,-ասաց Ջորջիա Կոկորիսը:

Էնդրյու Դիքսոնը նույնպես երկար տարիներ է աշխատում Արաքս Մանսուրյանի հետ: Շատ տպավորված է նրա մեծությամբ, նրա փորձով, աշխատանքային մոտեցումներով:

«Մեծ պատիվ է այսպիսի պրոֆեսիոնալի հետ աշխատելը: Արաքս Մանսուրյանը ամենալավ ուսուցիչն է, ով գոնե մեկ անգամ մեզ ստիպել է լացել: Իսկ պատճառը շատ ավելի լավ երգելն էր, երգելը կատարելագործելը»,-ասաց Էնդրյու Դիքսոնը:

Ջուլիետ Մունը հիշում է Արաքս Մանսուրյանի հետ հանդիպումը, որը փոխեց իր կյանքը:

«Երբ սկսեցի աշխատել Արաքս Մանսուրյանի հետ, այդ ժամանակ պատրաստ չէի երգել: Արաքսը Մանսուրյանը փոխեց իմ կյանքը: Ես նորից երգում եմ, ես գտա իմ երգային կյանքը: Երբ ես երգում եմ Արաքսի հետ, շատ երջանիկ եմ»,-նշեց Ջուլիետ Մունը:

Արաքս Մանսուրյանը ծնվել է 1946 թվականին Բեյրութում։ 1947 թվականին հայրենադարձել է։ Սովորել է Ռոմանոս Մելիքյանի անվան երաժշտական ուսումնարանում, 1977 թվականին ավարտել է Երևանի Կոմիտասի անվան պետական կոնսերվատորիան: 1977-1992 թթ.` Երևանի օպերայի և բալետի, 1992 թվականից` Սիդնեյի օպերային թատրոնների մեներգչուհի է:

Դերերգերից են՝ Էլիզաբեթ («Դոն Կարլոս»), Նեդդա («Պայացներ»), Լեոնորա («Տրուբադուր»), Աիդա («Աիդա»), Շուշան («Դավիթ-Բեկ»), Անուշ («Անուշ»)։ Մենահամերգներ է ունեցել Հայաստանում և արտասահմանյան մի շարք երկրներում՝ ծրագրում եվրոպական երգահանների կողքին ունենալով Կոմիտաս, հոգևոր միջնադարյան երգեր, հայ երգահանների ստեղծագործություններ։

Դասավանդում է Սիդնեյի կոնսերվատորիայում՝ օտարազգիներին ծանոթացնելով հայկական երգարվեստի հետ։ Նրա շնորհիվ բազմաթիվ օտարազգի երիտասարդ երգիչների երգացանկերում տեղ են գտել հայ երաժիշտների ստեղծագործություններ։