Դատարանները՝ պաշտոնյաների երեխաների փակ ակո՞ւմբներ

Հայաստանում տեղի ունեցած թավշյա հեղափոխությունը լուրջ հույսեր է արթնացրել Հայաստանի «աքիլլեսյան գարշապարը» հանդիսացող դատական համակարգի վերակենդանացման, իսկ եթե կուզեք՝ ռեսթարթի առումով: Սակայն վերջին շրջանում դատավորների և դատարանների ղեկավարների նշանակումները հուշում են, որ համակարգի առողջացման գործընթացը դեռևս սարերի հետևում է: Հակառակ դեպքում, ինչպե՞ս հասկանալ, որ կռուպցիայի բուն հանդիսացող դատարաններում ինչ-ինչ պատահականությամբ նշանակվում են հիմնականում նախկին պաշտոնյաների դուստրերը, զավակները, հեռու և մոտ բարեկամները:

 

ՀՀ վարչական դատարանի նախկին նախագահ Կարեն Մաթեւոսյանը Էջմիածին քաղաքի նախկին ոստիկանապետ Բաղիշ Մաթեւոսյանի որդին է: Վարչական դատարանի նոր նախագահ Աղասի Դարբինյանը Վանաձորի նախկին սկանդալային քաղաքապետ Սամվել Դարբինյանի որդին է, ՀՀ վարչական դատարանի միլիոնատեր դատավոր Անի Հարությունյանը ԱԱԾ նախկին փոխտնօրեն Գրիգոր Հարությունյանի` «Գրիշայի» դուստրն է, եւ այսպես շարունակ: Այսինքն, առնվազն վարչական դատարանի մասով, հանգիստ կարող ենք ասել, որ այն վերածվել է պաշտոնյաների բարեկամների փակ ակումբի:

 

 

Ստելլա Խաչատրյան