Ո՞ւմ շանսերն են ամենամեծը

Տարոն Մարգարյանի հրաժարականից հետո Երևանը մտավ քաղաքական նոր աժիոտաժի մեջ․ հիմա էլ բուռն քննարկումների ալիք է բարձրացել ապագա քաղաքապետի անվան շուրջ։ «Ելք»-ից, որպես ապագա քաղաքապետ, քննարկվում է Թեհմինե Վարդանյանի անունը, «Երկիր Ծիրանի»-ն, բնականաբար, հանդես կգա Զարուհի Փոստանջյանի գլխավորությամբ, «Ծառուկյան» դաշինքն էլ չի բացառում մասնակցել կայանալիք ավագանու ընտրություններին, որի անդամներն ընտրում են քաղաքապետին, սակայն ցուցակը գլխավորող թեկնածու դեռ չունի: ՀԱԿ-ի հավանական թեկնածուն Վահագն Խաչատրյանն է, իսկ ՀՀԿ-ն դեռ լռում է։

Ապագա քաղաքապետի, կայանալիք հավանական ընտրությունների, ենթադրյալ թեկնածուների և այս թեմայով այլ հարցերի շուրջ զրուցեցինք քաղաքագետ Երվանդ Բոզոյանի հետ։

-Պարո՛ն Բոզոյան, նոր իրավիճակում գործող իշխանությունն ինչպե՞ս կառաջնորդվի, որպեսզի չտուժի իր քաղաքական շահը։

-Ամենայն հավանականությամբ, կգնան արտահերթ ընտրությունների․ կարծում եմ՝ կցանկանան մաքուր էջով գնալ ավագանու ընտրությունների և հետո նոր գնան խորհրդարանական ընտրությունների։ Չեմ պատկերացնում՝ ԵԼՔ-ից ով կլինի քաղաքապետ, բայց այն, որ դաշինքը մեծ հավանակություն ունի հաղթելու՝ ակնհայտ է։ Եթե լինի 2-3 ամսից հետո, ապա նրանց հաջողության հավանակնությունն ամենամեծը կլինի։ Սակայն, մյուս կողմից, կարևոր է, թե ում կներկայացմնեն որպես թեկնածու։ Գիտենք, որ այս ընտրություններին կմասնակցեն և′ «Ծառուկյան» դաշինքը, և′ Զարուհի Փոստանջյանը․ այստեղ անձի դերը կարող է ոչ պակաս կարևոր լինել։

-Տվյալ դեպքում հնարավո՞ր է՝ «Ելք»-ն այնպիսի թեկնածու առաջադրի, որ  ձախողի։

-Ամեն ինչ հնարավոր է։ Իհարկե, Փաշինյանի վարկանիշն այսօր շատ բարձր է, և իր կուսակցության ցուցակը կարող է ամենաբարձր վարկանիշն ունենալ, բայց եթե անձի խնդիրը հաշվի առնենք, եթե այդ մարդն այդքան էլ հայտնի չլինի և չհասցնի, այսպես ասած,  այդ ընտրաշավի ժամանակ բացվել, ապա ես չեմ բացառում, որ ավելի հայտնի մեկը ցանկացած քաղաքական այլ թիմից, ընտրությունների ժամանակ գրանցի հաջողություն։

-Իսկ ՀՀԿ-ն, կարծում եք, կմասնակցի՞ ընտրություններին։

-ՀՀԿ-ի վիճակը մի քիչ բարդ է․ վերջին շրջանում ՀՀԿ-ն այնպիսի հարվածներ ստացավ․․․Զուտ քաղաքական տեսանկյունից՝ ես չեմ բացառում, որ իրենք կմասնակցեն ընտրություններին, բայց հաջողելու տեսանկյունից՝ խիստ կասկածում եմ։

 Լիլիթ Հակոբյան