Դատարանը հաստատված չի համարել Խաչատուրովի առնչությունն առաջադրված մեղադրանքին․ Միհրան Պողոսյան

ՀՀ գլխավոր դատախազությունը չի բողոքարկել Երևանի ընդհանուր իրավասության դատարանի հուլիսի 28-ի` ՀԱՊԿ գլխավոր քարտուղար Յուրի Խաչատուրովին գրավի դիմաց ազատ արձակելու որոշումը: Այս մասին ԼՈւՐԵՐ.com-ին հայտնեց ՀՀ գլխավոր դատախազության հանրային կապերի բաժնի պետ Արևիկ Խաչատրյանը:

Փոխարենը ՀՀ վերաքննիչ քրեական դատարան բողոք է նարկայացրել Խաչատուրովի պաշտպան Միհրան Պողոսյանը, սակայն ոչ թե իր պաշտպանյալին կալանքից գրավով ազատելու, այլ` կալանավորումը թույլատրելի ճանաչելու որոշման դեմ, քանի որ Երևանի ընդհանուր իրավասության դատարանի դատավոր Դավիթ Բալայանը Յուրի Խաչատուրովի նկատմամբ կալանքը որպես խափանման միջոց ընտրելու վերաբերյալ միջնորդությունը քննելիս,հետևություն է արել, որ սույն գործով կալանավորումը թույլատրելի է, այնուհետև մեղադրյալի նկատմամբ այլընտրանքային խափանման միջոց` գրավ կիրառելու որոշում կայացրել:

Փաստաբան Միհրան Պողոսյանը ԼՈւՐԵՐ.com-ի հետ զրույցում նշեց, որ դատավորի որոշումը վիճահարույց է: Նա կարծում է, որ Երևանի ընդհանուր իրավասության դատարանը մի դեպքում փաստել է, որ Խաչատուրովին առաջադրված մեղադանքի վերաբերյալ հիմնավոր կասկած առկա չէ, իսկ մյուս դեպքում նշել, որ մեղադրյալի կալանավորման համար նախատեսված հիմքերից մեկն առկա է:

«Որևէ փաստական տվյալ չի ներկայացվել, ինչով կհիմնավորվի Խաչատուրովի առնչությունն առաջադրված մեղադրանքին, դրա համար մենք դիմել ենք վերաքննիչ դատարան` վիճարկելու Խաչատուրովի նկատմամաբ կալանավորումը թույլատրելի ճանաչելու փաստը»,-նշեց նա:

Միհրան Պողոսյանի խոսքով` դատարանը հաստատված չի համարել Խաչատուրովի առնչությունն առաջադրված մեղադրանքին:

Փաստաբանը նշեց, որ եթե մեղադրանքի վերաբերյալ հիմնավոր կասկած առկա չէ, դատարանն իրավունք չունի կալանքը թույլատրելի ճանաչել: Իսկ ըստ Վճռաբեկ դատարանի՝  կասկածը համարվում է հիմնավոր միայն այն դեպքում, երբ անձի նկատմամբ կալանքը որպես խափանման միջոց ընտրելու վերաբերյալ միջնորդություն ներկայացնող պաշտոնատար անձը` քննիչը կամ դատախազը, կասկածվող անձի կատարած գործողությունների (անգործության) վերաբերյալ կներկայացնի տեղեկություններ, փաստեր կամ ապացույցներ, որոնք ուղղակիորեն կմատնանշեն նրա առնչությունն իրեն վերագրվող ենթադրյալ հանցագործությանը, ինչպես նաև կհիմնավորեն, որ դեպքը, որի կատարման մեջ անձը կասկածվում է, համընկնում է իրեն վերագրվող հանցանքի դեպքին:

Փաստաբանն անդրադառնալով Խաչատուրովի նկատմամբ ընտրված խափանման միջոց գրավը կալանքով փոխարինվելուն՝ նկատեց, որ դա հնարավոր է միայն նոր երևան եկած հանգամանքների առկայության դեպքում:

«Կամ պետք է Խաչատուրովին նոր մեղադրանք առաջադրվի, կամ նոր փաստական տվյալներ ձեռքբերվեն, որպեսզի կալանավորման միջնորդություն ներկայացվի դատարան»,-ասաց նա:

Նշենք, որ ՀՀ քրեական դատավարության օրենսգրքի 143-րդ հոդվածի համաձայն` դրված պարտականությունները և նախատեսված սահմանափակումները մեղադրյալի կողմից խախտելիս, գրավը որպես խափանման միջոց կարող է փոխարինվել կալանքով:

Հիշեցնենք, որ 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով ՀԱՊԿ գլխավոր քարտուղար Յուրի Խաչատուրովին հուլիսի 26-ին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը:

Հուլիսի 28-ին Երևանի ընդհանուր իրավասության դատարանի դատավոր Դավիթ Բալայանը Խաչատուրովի նկատմամբ որպես այլընտրանքային խափանման միջոց գրավը ճանաչել էր թույլատրելի: Գրավի չափ էր սահմանվել 5 մլն դրամը, ինչը վճարելուց հետո Խաչատուրովն ազատվել էր արգելանքից:

Դատարանի որոշումից հետո հայկական կողմը հայտարարել էր Խաչատուրովի փոխարինման գործընթացը սկսելու մասին, մինչդեռ, ըստ ռուսական կողմի, Հայաստանը պետք է սկսի ՀԱՊԿ գլխավոր քարտուղարի հետկանչի գործընթացը: 

Նշենք, որ ներկայումս Խաչատուրովը Մոսկվայում է և իրականացնում է իր` ՀԱԿՊ գլխավոր քարտուղարի պարտականությունները: