Հանքարդյունաբերության ոլորտում խաղի կանոնները կփոխվեն

Հանքարդյունաբերության ոլորտը, հանդիսանալով ՀՀ  արդյունաբերության կարևոր ոլորտներից մեկը, դեռևս չունի հստակ քաղաքկանություն և ռազմավարություն, որը թույլ կտա ունենալ տեսլական և իրականացնել կոնկրետ գործողություններ ոլորտի կայուն զարգացումն ապահովելու համար։ Դրա զարգացման ռազմավարության մշակման համար պետք է կատարել որոշակի ախտորոշիչ ուսումնասիրություններ ոլորտի առկա վիճակը վերլուծելու առավելություններն ու բացթողումները վեր հանելու համար։ Այսօր կառավարության նիստում այս մասին ասաց ՀՀ Էներգետիկ ենթակառուց­վածք­ների և բնական պաշարների նախարար Արթուր Գրիգորյանը։

Վարչապետ Նիկոլ Փաշինյանը նշեց, որ փաստ է՝ այսօր հանքարդյունաբերությունը ՀՀ տնտեսական աճի հիմնական շարժիչ ուժն է։

«Այսօր հանքարդյունաբերությունը մեր տնտեսական աճի հիմնական լոկոմոտիվն է և մեր կառավարությունը բազմիցս արձանագրել է, որ տնտեսական աճի այդ մոդելը որևէ կերպ չի կարող ընդունելի համարվել։ Մեր կառավարության կարևոր խնդիրներից է՝ փոխել տնտեսական աճի մոդելը ոչ միայն այն պատճառով, որ ուղղակի խոսքը տվյալ դեպքում վերաբերում է մեր ընդերքի վաճառքին, այլև այդ ընդերքի վաճառքից գեներացվող գումարների արդյունքում ձևավորված գումարների աճը ներառող չէ, այսինքն՝ այդ տնտեսական աճի ազդեցությունը իրենց վրա չեն զգում ՀՀ քաղաքացիները։ Մյուս կողմից՝ մենք պետք է բոլոր միջոցները ձեռնարկենք հանքարդյունաբերության ոլորտի նկատմամբ ավելի մեծ վերահսկողություն սահմանելու համար»,-նկատեց Փաշինյանը և հավելեց, որ շահագործման այնպիսի կանոններ պետք է հաստատվեն, որ հանրությունը զգա, որ այդ ազգային հարստությունը օգտագործվում է այնպես, որ դրանից պետությունն ու հանրությունը ստանում են այնքան օգուտներ, որքան պետք է ստանային:

Կառավարությունը հաստատեց հանքարդյունաբերության ոլորտի զարգացման հայեցակարգի կատարումն ապահովող միջոցառումների ցանկը հաստատելու մասին որոշումը: