Հին և նոր «դասալիքները». օրենքի առջև արտոնյալնե՞ր կան

Վերլուծական 24 Օգոստոս, 2018 15:13

Նորություն չէ, որ հայրենի պաշտոնյաներից շատերը չեն ծառայել հայոց բանակում: Դեռևս Կարեն Կարապետյանի պաշտոնավարման ժամանակ կառավարության կազմը համալրվեց բանակում չծառայած նախարարներով, որոնց համար հայրենիքը սկսվում և ավարտվում էր Կարապետյանի որոշումներով: Պարտադիր զինվորական ծառայություն չանցած նախկին նախարարներից են Դավիթ Հարությունյանը, Լևոն Մկրտչյանը, Սուրեն Կարայանը, Վարդան Արամյանը,Վահան Մարտիրոսյանը, Դավիթ Լոքյանը։ Բանակում չէր ծառայել նաև նախկին վարչապետ Կարեն Կարապետյանը:

Պարզվում է Նոր Հայաստանի նոր կառավարության կազմում էլ կան այդպիսիք: Hetq.am-ի ուսումնասիրությունից պարզ է դառնում, որ նոր կառավարությունից զինված ուժերում չեն ծառայել

առաջին փոխվարչապետ Արարատ Միրզոյանը (տարկետում)

փոխվարչապետ Տիգրան Ավինյանը (տարկետում)

ԿԳ նախարար Արայիկ Հարությունյանը (առողջական հիմքով)

սփյուռքի նախարար Մխիթար Հայրապետյանը, փոխնախարարներ Արամայիս Գրիգորյանն ու Բաբկեն Տեր-Գրիգորյանը ( նախարարի և փոխնախարար Արամայիս Գրիգորյանի՝ ծառայությունից ազատման հիմքերի մասին տեղեկատվություն նախարարությունից հրաժարվել են տրամադրել՝ նշելով, որ պահանջվող տեղեկությունը խախտում է մարդու անձնական և ընտանեկան կյանքի գաղտնիությունը)

ՊԵԿ նախագահ Դավիթ Անանյանը (ազատվել է)

Տնտեսական զարգացման և ներդրումների նախարար Արծվիկ Մինասյանը: զինվորական պատրաստվածությունը անցել է ԵՊՀ զինվորական ամբիոնում

Արդարադատության փոխնախարար Արթուր Հովհաննիսյան (ազատվել է)

Վարչապետի աշխատակազմի ղեկավար Էդուարդ Աղաջանյան (առողջական հիմքով)

Զինծառայություն չի անցել նաև վարչապետ Նիկոլ Փաշինյանը (ազատվել է)

Այս երկու ցուցակների պարզ համեմատությունը հասարակության մոտ հանրության լայն շրջանակների մոտ տրամաբանական հարց կարող է առաջացնել՝ իսկ ո՞րն է հների և նորերի տարբերությունը, եթե թե՛ նախկին, թե՛ ներկա պաշտոնյաները հարկ չեն համարել կատարել Հայրենիքի առջև իրենց պարտքը: Ընթերցողի հիշողությունը թարմացնելու համար նշենք, որ երբ Ազգային ժողովը քննարկում էր «Զինծառայության և զինծառայողների կարգավիճակի մասին» օրենքի նախագիծը, «Ելք» խմբակցությունը Փաշինյանի գլխավորությամբ, հենց այս հարցն էր բարձրացնում, ըստ որի, պաշտոնյաները, որոնք չեն ծառայել, պետք է վայր դնեն իրենց լիազորությունները:

Արդեն վարչապետի պաշտոնը ստանձնելուց հետո, Փաշինյանի հանձնարարականով, նախկին պաշտոնյաների և վերջիններիս զավակների՝ պարտադիր զինվորական ծառայությունից ազատման հիմքերն ու դրանց օրինականության ուսումնասիրման գործընթաց է մեկնարկել: Իսկ ինչո՞ւ այդ ստուգումը չի տարածվում նոր կառավարության անդամների վրա: Նրանց՝ զինվորական ծառայությունից ազատվելու հիմքերը բավարարե՞լ են Փաշինյանին: Թե՞ նոր կառավարության անդամները մտավախություն ունեն, որ ստուգման արդյունքում կարող են վեր հանվել նախկին համակարգին բնորոշ արատավոր մեխանիզմներ: Եթե վերջիններս այն ժամանակ չեն զբաղեցրել բարձր պաշտոններ, դա իհարկե դեռ չի նշանակում, որ չեն ունեցել զինվորական ծառայությունից խուսափելու հնարավորություններ, ինչպես ասում են՝ «ձեռքերը քարի տակ» չէր: Եթե պարզվի, որ ոչ բոլորն են գործող նախարարներից, փոխնախարարներից հանճարներ, գիտության վերջին մոհիկաններ, կամ «ծանր հիվանդներ», այդ դեպքում չար լեզուները Փաշինյանին անհապաղ կհիշեցնեն ԱԺ-ում պատգամավորի կարգավիճակում արված իր հայտարարությունները:

Այսօր Փաշինյանը շատ լավ շանս ունի գործնականում ապացուցելու իր սկզբունքայնությունը: Մեկնարկած ստուգումները հավասարապես պետք է վերաբերվեն թե՛ նախկին, թե՛ նոր պաշտոնյաներին, և այո՛, եթե պարզվի, որ Նոր Հայաստանի որոշ պաշտոնյաներ շարունակում են առաջնորդվել հին համակարգին բնորոշ արժեհամակարգով, ապա նրանք պետք է վայր դնեն իրենց լիազորությունները: Հատկապես Նոր Հայաստանում օրենքի պահանջը պետք է հավասար լինի բոլորի համար՝ հողի մշակից մինչև վարչապետ: Սա է միակ ճանապարհը, եթե Փաշինյանը չի ցանկանում, որպեսզի իր կառավարությունը համեմատվի նախորդ՝ «դասալիքների» կառավարությունների հետ: