Ինպե՞ս է լուծվելու Նուբարաշենի աղբավայրի խնդիրը

Նուբարաշենը միակ աղբավայրն է մայրաքաղաքում, որը տասնամյակներով ձևավորված բաց աղբավայր է, և իր այսօրվա գոյությամբ չի բավարարում ոչ մի չափանիշի։ Էկոլոգիական, քաղաքաշինության, առողջության և բնակավայրի տարածքում լինելու տեսանկյունից այն վտանգ է ներկայացնում։ Այս մասին քաղաքապետարանում Նուբարաշենի բնակիչների հետ հանդիպման ժամանակ նշեց Երևանի քաղաքապետի պաշտոնակատար Կամո Արեյանը՝ շնորհակալություն հայտնելով բնակիչներին՝ մտահոգվելու համար։ 

Բնակիչների պահանջն է՝ հնարավորինս սեղմ ժամկետներում լուծել աղբանոցի խնդիրը կամ գոնե հողով ծածկել աղբավայրը, որ գարշահոտությունը չլցվի իրենց տները:

«Հեռանկարը հետևյալն է, որ ՀՀ կառավարության եւ ՎԶԵԲ-ի միջև կնքվել է վարկային համաձայնագիր, որ այդ վայրին հարակից ստեղծվի նոր, ժամանակակից աղբավայր: Մրցութային փաթեթը հաստատվել է և մրցույթը կհայտարարվի մոտ ժամանակներս: Աղբավայրը լինելու է պարսպապատված, լուսավորության համակարգով հագեցած, ընդունիչ կետով, պահակային ծառայությամբ, կշեռքով: Ամբողջ ստորգետնա տարածքը դառնում է դրենաժային համակարգ, որպեսզի ջրերը չկուտակվեն, չաղտոտեն տարածքը, հոտի տարածում չլինի: Բացի այդ, ամբողջ հատակը ջրամեկուսացվում է՝ հողերը հետագա աղտոտումից փրկելու համար: Իսկ հիմա աղբավայրի ջրերը հոսում են մինչև Էրեբունի եւ լցվում ջրանցքը: Աղբավայրն ունենալու է նաև պարտադիր ցողման եւ հողածածկման աշխատանքներ: Յուրաքանչյուր ընդունումից հետո պետք է ցողվի ջրով, որպեսզի հոտի խնդիրը վերանա: 28 հա վրա պետք է կառուցվի աղբավայրը: Մեկ-երկու տարվա ընթացքում կմեկնարկի ծրագիրը: Այսինքն՝ այս ամենն առնվազն 2 տարի կտևի»,-ասաց Արեյանը:

Իսկ բնակիչների այսօրվա մտահոգության վերաբերյալ Արեյանը առաջարկում է, որ օպերատորը հարթեցման աշխատանքները դարձնի պարբերաբար՝ աղբը հնարավորինս բնակավայրից հեռու լինելու համար, նաև աշխատանքներ կկատարվեն աղբը հողով ծածկելու համար։ 

Մեկ այլ աղբավայր ստեղծելու միտքն Արեյանը սխալ է համարում, քանի որ դրա հնարավորությունը քաղաքում չկա «Անթույլատրելի է, որ երկրորդ աղբավայրը ստեղծենք հիմա: Այո՛, կարելի էր ժամանակին քայլեր անել, որ վիճակն այսքան չսրվեր»,-ասաց նա։

Հիշեցնենք, որ Նուբարաշեն վարչական շրջանի մայրուղին նուբարաշենցիները փակել են և պահանջել աղբավայրի հարցի լուծում։