Հրազդանում վերաբացվեց Հայրենական մեծ, Արցախյան և Ապրիլյան պատերազմներում զոհվածների հուշարձանը

Հրազդան քաղաքում վերաբացվեց Հայրենական մեծ, Արցախյան և Ապրիլյան պատերազմներում զոհվածներին նվիրված հուշարձանը։ Հուշահամալիր-պանթեոնի վերաբացման արարողությանը ներկա էր նաև ՀՀ վարչապետ Նիկոլ Փաշինյանը։

«Հանուն հայրենիքի զոհվելու պատրաստակամությունը մարդկային գիտակցության ամենաբարձր կետն է։ Այս տղաները զոհվել են հանուն կյանքի, և ամեն զոհվողի հետ ամեն ապրողի պատասխանատվությունն ավելի է ծանրանում։ Մենք այսպիսի բարձր հուշարձանները կանգնեցնում ենք մեզ համար, որ ամեն օր զգանք այն պատասխանատվությունը, որ մեր ուսերին ընկել է ամեն զոհվողի հետ, որ ամեն անգամ այս հուշարձաններին նայելիս վերագտնենք մեր ամոթն ու խիղճը, եթե մի պահ կորցրել ենք այն։ Այս մարդիկ զոհվել են ոչ թե հանուն մահվան, այլ հանուն կյանքի։ Մենք մեր ուսերին ամեն զոհվածի հետ պատասխանատվություն ենք վերցրել, և որևէ կասկած չկա, որ այդ պատասխանատվությունը ամեն օր մեր կյանքի առաջ է, որովհետև այս հուշարձանները ոչ միայն մեր աչքի առաջ են, այլև մեր հոգու ու սրտերի մեջ են։ Մենք ամեն օր պետք է կանգնենք այս հուշարձանների առաջ ու պատասխան տանք մեր արածների ու չարածների համար»,- ասաց վարչապետը։

Նորոգման աշխատանքների նախաձեռնող, «Սասուն» կամավորական ջոկատի հրամանատար, ԱԺ պատգամավոր Սասուն Միքայելյանի խոսքով՝ օրը նշանավոր է, այսուհետ օգոստոս ամսվա վերջին շաբաթը կլինի հրազդանցիների ուխտի օր։

«Հուշահամալիրի տարածքը դեռ ընդլայնվելու է, դառնալու է քաղաքային պանթեոն։ Տեղադրվելու են նաև զորավար Անդրանիկի և սպարապետ Վազգեն Սարգսյանի կիսանդրիները»,- նշեց Սասուն Միքայելյանը։

Հուշահամալիրի վերակառուցման աշխատանքները սկսվել են երկու տարի առաջ։