Մակունցը թվարկել է Մշակույթի նախարարության 5 գերակա խնդիրներն ու ուղղությունները

«Արդեն նախագծված ծրագրերի նախահաշիվները վերանայվել են, մեզ հաջողվեց կատարել որոշակի խնայողություններ, ինչի շնորհիվ կարողացանք բալանսի բերել այն ֆինանսական անջրպետը, որը գոյություն ուներ երկրորդ և երրորդ եռամսյակների միջև: Խնայողությունները թույլ տվեցին նաև իրականացնել մի շարք նոր նախագծեր»:

Այս մասին այսօր, իր պաշտոնավարման 100 օրն ամփոփելիս նշեց Մշակույթի նախարար Լիլիթ Մակունցը: Նախարարը նշեց, որ 100 օրերի ընթացքում եղել է 11 խոշորագույն միջոցառում, դրանց մեծ մասը՝ միջազգային:

Դրանցից մեկն իրականացվել է խնայողությունների հաշվին: Նա նշեց` մշակութային ռազմավարությունը մշակելուց առաջ սահմանել են գերակա խնդիրներն ու ուղղությունները, որոնք հինգն են. «Մշակույթի և կրթության համադրումը, մշակույթի ապակենտրոնացումը և մարզային համաչափ զարգացումը, օրենսդրական դաշտի կարգավորումը, պատմաշակութային արժեքների, հուշարձանների պահպանությունը, հանրահռչակումը և օգտագործումը, հինգերորդը` դրամաշնորհային մոտեցման քաղաքականության կիրառումը»,-ընդգծեց Մակունցը:

Նրա խոսքով` մշակութային մի շարք խնդիրներ 100 օրվա ընթացքում լուծում են ստացել. «7 կառույցի տրվել է նորահայտ հուշարձանի կարգավիճակ, Շիրակի երկրագիտական թանգարանին տրամադրվել է նոր շենք, վերանայվել է դահլիճների վարձակալության ծրագիրը, ստեղծվել է գրականության հանրահռչակման բաժին, միջամտություն է ցուցաբերվել ու կանխվել թվով 32 հուշարձանների վտանգումը»,- ասաց նախարարը` հավաստիացնելով՝ այս պահին աշխատանքներ են տարվում մինչև տարեվերջ ավարտին հասցնելու Կինոյի, Թատրոնի և Թանգարանների մասին օրենքների նախագծերի մշակումը: