Փաշինյանի վերջնագիրը և «հակահեղափոխության» կապիտուլյացիան

Այսօր տարածվեց տեղեկատվություն, ըստ որի՝ հանդիպել են Ազգային ժողովի նախագահ Արա Բաբլոյանը և վարչապետ Նիկոլ Փաշինյանը։ Հանդիպման նախաձեռնությամբ ավելի վաղ հանդես էր եկել Ազգային ժողովի նախագահը՝ երկրի ներքաղաքական դրության մասին արված հայտարարությունով։ Այս հանդիպումը ուշագրավ է այն առումով, որ Փաշինյանի՝ օգոստոսի 17-ին արված հայտարարությունը ոչ այլ ինչ էր, քան վերջնագիր ՀՀԿ-ին և հակահեղափոխության հույսեր փայփայող խորհրդարանական այլ ուժերին: Եվ այսօր տարածած հաղորդագրությունը ցույց է տալիս, որ Փաշինյանի վերջնագիրը, այնուամենայնիվ, ունեցել է իր ազդեցությունը:

Այսպես՝ կողմերը եկել են այն եզրակացության, որ արդարադատության գործող համակարգը դեռևս իրեն չի սպառել, հետևաբար, արդարադատության անցումային մարմինների ձևավորումը թեև դուրս չի մղվում օրակարգից, սակայն դառնում է Փաշինյանի՝ այսպես ասած՝ պահուստային տարբերակը: Ըստ երևույթին՝ Փաշինյանը չէր էլ պատրաստվում իրականություն դարձնել հանրահավաքի ընթացքում հնչեցրած իր այդ նախաձեռնությունը, և դա ընդամենը քաղաքական մեսիջ էր ՀՀԿ-ին: Մյուս կողմից՝ ՀՀԿ արձագանքն է, որ ստիպում է Փաշինյանին հետ կանգնել այդ ծրագրից: ՀՀԿ-ն, իհարկե, կփորձեր որքան հնարավոր է ձգձգել նման մարմինների ձևավորումը՝ պատճառաբանելով հանրային լայն քննարկման, միջագզային գործընկերների հետ համաձայնության գալու անհրաժեշտությամբ: Սա ոչ այլ ինչ էր, քան ժամանակ ձգելու ցանկություն, որը ժամանակին կանխվում է Փաշինյանի կողմից: Արդյունքում ՀՀԿ-ն զրկվում է մանևրելու ևս մեկ հնարավորությունից: Հայտարարության մեջ նշվում է նաև, որ խորհրդարանական արտահերթ ընտրությունները պետք է անցկացվեն առնվազն մեկ տարվա ընթացքում: Իհարկե, նման համաձայնությունը, այն էլ Բաբլոյանի մակարդակով, վկայում է, որ Փաշինյանը չպետք է թուլանա: ՀՀԿ ցանկացած պահի կարող է փոխել իր որոշումը և խափանել վարչապետի ծրագրերը, այդ իսկ պատճառով՝ Փաշինյանի կողմից նախանշած սահմանադրական փոփոխությունները դառնում են օրակարգային…