Ես պատրաստ եմ իմ աշխատասենյակում կախել այն մարդու լուսանկարը, ով կլինի երկրի ղեկավար. Արևշատի համայնքապետ
Քաղաքական
Այսօր մամուլում տեղեկութոյւններ եղան այն մասին, որ վարչապետ Նիկոլ Փաշինյանի լուսանկարն արդեն հայտնվել է Շիրակի մարզի Արևշատ համայնքի ղեկավար Սայադ Խաչատրյանի աշխատասենյակի պատին:
«Քաղաքացիական պայմանագիր» կուսակցության մամուլի խոսնակ Վահան Կոստանյանն էլ, արձագանքելով այս հանգամանքին՝ քիչ առաջ սոցցանցի միջոցով տեղեկացրեց, որ խոսել է Արևշատ համայնքի ղեկավարի հետ և խնդրել պատից հեռացնել վարչապետի լուսանկարը.
«Մեր քաղաքական թիմի համար անընդունելի են հին Հայաստանում գործած արատավոր ավանդույթները։ ՀՀ պաշտոնյաների աշխատասենյակներում պատից կարող է կախված լինել միայն ՀՀ զինանշանը»,- նշում է նա։
ԼՈւՐԵՐ.com-ի թղթակցի հետ զրույցում Արևշատ համայնքի ղեկավար Սայադ Խաչատրյանը նշեց, որ վարչապետի լուսանկարն արդեն հեռացրել է իր աշխատասենյակի պատից.
«Փաշինյանը շատ մեծ գործեր է արել հայրենիքի, մեզ համար: Մենք ուրախացել ենք, որ ինքն է մեր վարչապետը և զինանշանի ու նրա լուսանկարը կողք-կողքի փակցրել եմ աշխատասենյակումս: Նախկինում Սերժ Սարգսյանինն էր, քանի որ նա էր երկրի ղեկավարը, հիմա էլ Նիկոլ Փաշինյանինն է: Ես պատրաստ եմ իմ աշխատասենյակում կախել այն մարդու լուսանկարը, ով կլինի երկրի ղեկավար, առավել ևս, Փաշինյանի դեպքում, քանի որ ողջ ազգով շատ ենք ուրախացել իր համար ու շատ սիրում ենք իրեն»,- ասաց համայնքապետը:
Փաստորեն, նախկին արատավոր երևույթները փորձում են կիրառել նաև ներկայիս ղեկավարները: Թե ինչ միտում ունեն դրանք, թողնում ենք ձեր հայեցողությանը: Սակայն այս դեպքում պետք է գնահատել նոր իշխանության որդեգրած քաղաքականությունը՝ վերջ դնել նախկին արատավոր ավանդույթներին:
Սոնա Հարությունյան
Լուսանկարները՝ Hayastan24.com-ի
ՈՒՂԻՂ ԵԹԵՐ
Ամենադիտված 
Ծեծկռտուք Մոսկվայի ռեստորաններից մեկում՝ հայտնի գործարարի և «Դոն Պիպոյի» միջև․ վերջինս թիկնապահի հետ փախուստի է դիմել (տեսանյութ)
