Քաղաքագետը լավատես է հայ-գերմանական հարաբերություններն անհրաժեշտ տնտեսական որակի բարձրացնելու հարցում

Քաղաքագետ Նարինե Դիլբարյանը համոզված է, որ Գերմանիայի Դաշնային Հանրապետության կանցլեր Անգելա Մերկելի այցը Հայաստան դրական կանդրադառնա հայ-գերմանական հարաբերությունների վրա:

Քաղաքագետը լրագրողների հետ զրույցում նշեց, որ Անգելա Մերկելին շատ էր տպավորել Հայաստանի բաց հասարակությունը:

«Մենք կարողացանք ցույց տալ, որ բաց հասարակություն ենք. այն խանդավառությունը, որով   ընդունեցին Մերկելին և՛ հասարակ քաղաքացիները, և՛ մեր իշխանությունները, կարծում եմ, նրան շատ էր տպավորել»,- ասաց Դիլբարյանը:

Ըստ քաղաքագետի` հայ-գերմանական հարաբերությունները 21-րդ դարում կարող են ստանալ անհրաժեշտ որակ թե՛ տնտեսական, և՛ թե ֆինանսական  ոլորտներում:

Դիլբարյանը հույս հայտնեց, որ հայկական կողմից իրական ծրագրեր են ներկայացվել Գերմանիայից ժամանած պատվիրակությանը:

«Այն, որ սոցիալական ծրագրերի աջակցության սպասումներ կան՝ ես դա լսեցի Գերմանիայի դեսպանի խոսքերում, իհարկե, բավարար հիմք չէ։ Սոցիալական, գիտամշակութային և ճանաչողական առումով այցը կայացել է, և կայացել է նաև շնորհիվ այն բանի, որ Մերկելն իսկապես պատրաստված էր եկել։ 

Կաթողիկոսը Մերկելին նվիրեց Ադրբեջանի և Թուրքիայի տարածքում գտնվող և այնտեղ ոչնչացվող պատմամշակութային հուշարձաններին վերաբերող գրքեր, և, ինչպես եկեղեցուց իմ աղբյուրներն են հաղորդել, նա թեմայից տեղյակ էր, հայկականությունը Մերկելին անծանոթ չէր։ Այս այցը Փաշինյանի վարչապետության օրոք կարելի է կոչել ամենաազդեցիկներից մեկը, և այն անցավ իսկապես բարիդրացիական մթնոլորտում, գուցե դրան կհաջորդեն իրական ծրագրեր»,- եզրափակեց Դիլբարյանը: