Ո՞վ և ի՞նչ կշահի Քոչարյան-Բաբայան համագործակցությունից. ամենաանհավանական սցենարը

Մամուլում այսօր տեղեկատվություն էր տարածվել, որ ԼՂՀ ՊԲ նախկին հրամանատար, Արցախի հերոս Սամվել Բաբայանը վարձակալել է ՕՐՕ դաշինքի Երևանի Վարդանանց փողոցի վրա գտնվող ընդարձակ գրասենյակը և առաջիկայում սկսելու է ակտիվ քաղաքական կոնսուլտացիաներ: Այդ նույն տեղեկատվության համաձայն՝ Սամվել Բաբայանը կհամագործակցի նոր ձևավորվող «Սասնա Ծռեր» կուսակցության հետ։ Չի բացառվում, որ Սամվել Բաբայանը ստվերային համագործակցություն ծավալի Ռոբերտ Քոչարյանի հետ։ 

Սամվել Բաբայանի կողմից քաղաքականության վերադառնալու լուրը անմիջապես պաշտոնապես հերքվեց նրա գրասենյակի կողմից, միևնույն ժամանակ, գրասենյակից ակնարկեցին, որ իր հետագա գործողությունների վերաբերյալ Բաբայանը ինքը կտեղեկացնի «սոլիդ և լուրջ ԶԼՄ-ների» միջոցով: Մի ուշագրավ դրվագ, այնուամենայնիվ, անհրաժեշտ է նշել՝ 2rd.am-ը հրապարակել է արխիվային լուսանկարներ Ղարաբաղյան շարժման սկզբի և պատերազմի տարիներից: Լուսանկարներում Երկրորդ նախագահ Ռոբերտ Քոչարյանն է, ազգային հերոս Մոնթե Մելքոնյանը, ԼՂՀ նախագահ Բակո Սահակյանն ու ԼՂՀ Պաշտպանության նախկին հրամանատար Սամվել Բաբայանը: Սա ընդամենը Քոչարյանի «փառապանծ» անցյալը ներկայացնելու փո՞րձ էր, թե՞ ակնարկ հնարավոր համագործակցության վերաբերյալ՝ դժվար է ասել: Համենայն դեպս, անցյալ տարի լրատվամիջոցներից մեկին տված իր հարցազրույցում հայտարարել է բառացիորեն հետևյալը՝ «Եթե քաղաքական ուժերը համախմբվեն, իհարկե, ես օգտակար կլինեմ, բայց, եթե չեն համախմբվում, իմաստ չունի քաղաքականությամբ զբաղվել»:

Այս պահին քաղաքական ուժերի համախմբման մասին խոսելն ավելորդ է, եթե նման գործընթաց ծավալվում է, ապա այն լատենտ է: Միևնույն ժամանակ, Բաբայանի համագործակցությունը «Սասնա Ծռերի» հետ շատ ավելի հավանական տարբերակ է, այն առումով, որ թե Ծռերը, թե Բաբայանը Լևոն Տեր-Պետրոսյանի կողմից նշած «ոչ մի թիզ հողականներից» են: Այսինքն, համախմբման առնվազն գաղափարական պլատֆորմը առկա է, Ծռերն էլ, Բաբայանն էլ հայտարարում են, որ Արցախի հարցում ոչ մի զիջում լինել չի կարող: Ինչ վերաբերվում է Քոչարյանին, «Երկիր Մեդիա» հեռուստաընկերության եթերում վերջին հարցազրույցի ընթացքում Քոչարյանը ևս հատուկ ուշադրություն է դարձրել Արցախի անվտանգության հարցին՝ քննադատելով նոր իշխանությունների նախաձեռնողականության պակասը և անփորձությունը՝ բանակցային գործընթացում: Այստեղից կարելի է ենթադրել, որ վերոնշյալ երեք կողմերը կարող են համագործակցել, օրինակ, այն պարագայում, երբ նոր իշխանություններն առաջ բերեն «հող հանձնելու օրակարգը», ինչը, համաձայնեք՝ ֆանտաստիկայի ժանրից է:

Պետք է նաև հասկանալ, թե եթե անգամ այդ համագործակցությունը կայանա՝ ի՞նչ կշահի դրանից համագործակցող կողմերից յուրաքանչյուրը: Սամվել Բաբայանին, կամ «Սասնա Ծռերին», որոնք մի քանի օր առաջ ընդամենը քաղաքական կուսակցության ֆորմատով ներկայացան հանրությանը, անգամ մեծ ցանկության դեպքում չես համարի հանրային լայն ընկալում ունեցող քաղաքական շրջանակներ, կամ հենք, որը կկարողանա դառնալ Քոչարյանի վերադարձի պլատֆորմը: Բացի այդ, ինքը՝ Քոչարյանը ևս, մեղմ ասած, հանրային լայն աջակցություն չի վայելում՝ հաշվի առնելով, թե շուրջ տասը տարվա քաղաքական դադարը, թե այդ ընթացքում նրա անվան հետ կապվող բազմաթիվ նեգատիվ երևույթների արդյունքում անկում ապրած վարկանիշը: Այս տեսանկյունից՝ կողմերի համագործակցությունը արդյունավետ չի լինի, ավելին՝ ավելի շատ «արջի ծառայություն» կմատուցի կողմերից յուրաքանչյուրին…