Հայաստանում մինչև 2020 թվականը 100 մեգավատտ հզորությամբ արևային կայաններ կկառուցվեն

Մեր բոլոր ծրագրերը միտված են լինելու ՀՀ-ում էներգետիկ անվտանգությունը և հուսալիությունը ապահովելուն և այդ առումով՝ շատ կարևոր է ՀՀ-ում այլընտրանքային էներգետիկայի զարգացումը։ Այս մասին լրագրողների հետ հանդիպմանն, ամփոփելով 100-օրյա իր աշխատանքային գործունեությունը՝ ասաց ՀՀ էներգետիկայի և բնական պաշարների նախարար Արթուր Գրիգորյանը։

«Մեզ համար համարվում է առաջնահերթություն վերականգնվող էներգետիկան։ Այն ռազմավարական լուրջ նշանակություն ունի ՀՀ համար: Մենք փորձում ենք ամեն ինչ անել, որպեսզի ՀՀ-ը հնարավորինս թույլ կախվածություն ունենա այլ էներգառեսուրսներից»,-ասաց նախարարը:

Նախարարը նշեց, որ կարևորում են այլընտրանքային էներգետիկան, հատկապես, արևային էներգետիկայի զարգացումը Հայաստանում։

«Այդ ուղղությամբ մեր կողմից ձեռնարկված բոլոր միջոցառումները թույլ են տվել, որպեսզի մենք զարգացնենք հատկապես ՀՀ-ում արևային էներգետիկան։ Ամբողջ աշխարհում հատկապես էներգետիկայի մասով առաջընթացները միտված են արևային էներգետիկայի զարգացմամբ․ մենք իրավունք չունենք հետ մնալու այդ գործընթացից։ Հաշվի առնելով ՀՀ աշխարհագրական դիրքը, արևային էներգիան օգտագործելու բոլոր հնարավությունները, մի քանի անգամ բազմակողմանի խորհրդակցությունների արդյունքում որոշվել է, որ նախարարությունն առաջարկություն ներկայացնի Հանրային ծառայությունները կարգավորող հանձնաժողով, որպեսզի մինչև 2020թ. հունվարի 1-ը 100 մեգավատտ հզորությամբ արևային կայաններ կառուցվեն Հայատանում», - ասաց Գրիգորյանը: