Ի՞նչ աշխարհաքաղաքական-տնտեսական պրեսինգ է սպասվում նոր իշխանություններին

Վերլուծական 29 Օգոստոս, 2018 18:00

Ազգային ժողովի արտահերթ նիստում այսօր պատգամավորների ուշադրության կենտրոնում էր Վրաստանի կառավարության վերջերս կայացրած որոշումը, ըստ որի՝ սեպտեմբերի 15-ից Վրաստանի տարածքում արգելվելու է բեռնատարներով ցորենի ներկրումն ու տեղափոխումը: Սա ենթադրում է, որ հացահատիկն այլևս չի կարող Հայաստան ներկրվել վերգետնյա տրանսպորտով: Ամենապարզ հաշվարկով, մեկ տոննայի մեջ թանկացումը 50 դոլար է կազմելու, ինչը ներմուծողների համար ձեռնտու չես համարի:

Սա, միանշանակ, հանգեցնելու է նոր թանկացումների: Օրինակ՝ հացի թանկացումը շատ արագ կարող է թոթափել հեղափոխական էյֆորիան, որովհետև ակնհայտ է, որ այս ամիսների ընթացքում քաղաքացիների սոցիալական բեռը էականորեն չի մեղմվել: Կոռուպցիայի դեմ պայքարը, իհարկե, անչափ ողջունելի է, սակայն հանրությանը բացի տեսարաններից անհրաժեշտ է նաև հաց տալ: Եվ հենց այստեղ է վարչապետ Փաշինյանը բախվելու նոր խնդրի: Մյուս կողմից՝ հարկավոր է հասկանալ՝ արդյոք Վրաստանի կառավարության այս որոշումն ունի՞ աշխարհաքաղաքական ենթատեքստ, թե՝ ոչ: Անգամ եթե մեր հարևանները նպատակամղված կերպով չեն ձգտում ծանր կացության մեջ դնել Հայաստանի նոր իշխանություններին, կամա թե ակամա՝ նրանց այս որոշումը և դրանից բխած հետևանքները լուրջ հարված են հասցնելու Փաշինյանին՝ այն էլ՝ ընտրություններին ընդառաջ:

Բացի այդ, մեզ հասած տեղեկություններով, օրերս «Գազմպրոմ»-ի ղեկավար Ալեքսեյ Միլլերն անձամբ է Հայաստանի նոր իշխանություններին տեղեկացրել, որ նոյեմբերին սպասվում է գործող պայմանագրով ֆիքսված գնի վերանայում: «Գազպրոմ»-ի հետ գործող պայմանագիրը ուժի մեջ է մինչև նոյեմբեր, և եթե թանկանա նաև գազի գինը, ապա կարելի է ասել, որ Հայաստանի նոր իշխանությունները կհայտնվեն տնտեսական լուրջ պրեսինգի տակ: Այդ ճնշման առաջին նշույլներն արդեն տեսանելի են՝ Հայաստանի տնտեսական ակտիվների մեծ մասը տնօրինող Ռուսաստանը մինչ այս պահը Հայաստանի ատոմակայանին չի տրամադրել անհրաժեշտ վառելիքը և տարբեր խողովակներով հիշեցնում է, որ ատոմակայանի կանգնելու դեպքում «կկանգնի» ողջ Հայաստանը, որովհետև ապահովում է Հայաստանի էներգիայի քառասուն տոկոսը։ Տնտեսական պրեսինգի նպատակը մեկն է՝ քաղաքական հարթակում զիջումներ կորզելը: Սակայն խնդիրը միայն Ռուսաստանը չէ: Արևմտյան գործընկերները ևս չեն շտապում օգնության ձեռք մեկնել նոր իշխանություններին, ինչը, ի դեպ՝ նույնպես տնտեսական պրեսինգի տարատեսակ է:

Նիկոլ Փաշինյանի կաբինետին անհրաժեշտ է օր առաջ լուծել այն անչափ կարևոր խնդիրները՝ խուսափելու համար դրանց առաջացրած անվերահսկելի հետևանքներից: Չէ՞ որ առջևում ընտրություններ են, իսկ հատկապես տնտեսական ոլորտում խնդիրների առկայությունը լուրջ խաղաքարտ կարող է դառնալ Փաշինյանի ընդդիմախոսների ձեռքում…