Ունենք մեծամասնություն ունենալու հավակնություն. Դավիթ Խաժակյան

«Տրամադրվածությունը հաղթական է, որովհետև իմ ձեռքում գտնվում է մի ցուցակ, որտեղ ներառված են քաղաքացիներ, մասնակիցներ, որոնք պատրաստ են ստանձնել քաղաքային կառավարումը, ունեն դրա համար գիտելիքների և հմտությունների բազա: Բայց դրանք չեմ դիտարկում համեմատական մնացածի հետ: Մրցակից համարում ենք բոլորին ու բոլորին հարգանքով ենք մոտենում: Մեր ծրագիրը կներկայացնենք հաջորդիվ»,- այս մասին այսօր ԿԸՀ-ում լրագրողների հետ զրույցում նշեց «Լույս» դաշինքի ներկայացուցիչ Դավիթ Խաժակյանը: 

Նա նշեց՝ ավագանու ցուցակը բաղկացած է խորհրդանշական 111 հոգուց. «Ցուցակը գլխավորում է Արդարադատության նախարար Արտակ Զեյնալյանը՝ քաղաքապետի մեր թեկնածուն: Ցուցակի երկրորդ համարը ես եմ՝ Ավագանու ԵԼՔ խմբակցության ղեկավարս, երրորդը՝ ավագանու ԵԼՔ խմբակցության անդամ Անի Խաչատրյանը, չորրորդը՝ Ավագանու ԵԼՔ խմբակցության անդամ Անի Սամսոնյանը, ներառված են նաև ավագանու անդամներ Հարություն Բաբայանը, Տիգրան Տեր-Մարգարյանը, «Վերադարձ Հայաստան» կազմակերպության ղեկավար Վարդան Մարաշյանը և այլն»,- լրագրողների հետ զրույցում ասաց Ավագանու ԵԼՔ խմբակցության ղեկավար Դավիթ Խաժակյանը: 

Հարցին՝ ինչո՞ւ հենց իրենց թեկնածուին պետք է ձայն տալ, Խաժակյանը պատասխանեց. «Քանի որ վերջինս տիրապետում է մայրաքաղաքի բոլոր խնդիրներին ու իրենց թիմը կենտրոնացած է այդ խնդիրների լուծման ճանապարհների վրա»:

Նրա խոսքով՝ իրենց թիմը տեսնում է տարիներով կուտակված խնդիրները և առաջարկում է ոչ թե գոյատևում, այլ զարգացում. «Հաղթանակը ենթադրում է ձայների մեծամասնությունը, թե ինչ տոկոսային հարաբերությամբ, որոշելու են մեր քաղաքացիները, բայց մենք ունենք մեծամասնության հավակնություն»,- նշեց նա: