Հայկ Մարությանը մեզ համար բարեկամական մրցակից է. Արմեն Մարտիրոսյան

«Բոլորն էլ հիմնական մրցակից են մեզ համար, բայց մրցակիցների մեջ կան մի քանիսը, որոնք ուղղակի բարեկամական մրցակից են, օրինակ՝ Հայկ Մարությանը, այսինքն՝ այն ուժերը, որոնք ընդդիմության շարքերում պայքարել են այսօրվա համար, բոլորին համարում ենք բարեկամական մրցակիցներ»,-այս մասին այսօր ԿԸՀ-ում լրագրողների հետ զրույցում ասաց «Ժառանգություն» կուսակցության ղեկավար Արմեն Մարտիրոսյանը:

Նա նշեց՝ իրենք Երևան քաղաքի զարգացման ծրագիր են ներկայացնելու. «Մեր կարգախոսը «ժպտա»-ն է, մենք պետք է ժպտանք, որովհետև հաղթել ենք, մենք հասանք այն օրվան, երբ կարողացանք իշխանափոխություն անել»,-նշեց նա:

Առաջին անգամ Հանրապետական կուսակցությունը չի մասնակցում Երևանի քաղաքապետի ընտրություններին: Հարցին՝ ո՞րն է պատճառը, Մարտիրոսյանը պատասխանեց. «Որովհետև այն մեծամասնություն չունի: Այն կեղծիքներով, թվանկարչությամբ, ընտրակաշառքով եկած ուժ է»:

Անդրադառնալով ԿԸՀ-ի գործելաոճին՝ Մարտիրոսյանն ասաց. «Այն, որ ԿԸՀ-ն շատ մեղքեր ունի՝ ակնհայտ է, որովհետև արդարացրել է ընտրակեղծարարությունը: Բայց մենք գիտենք, որ ընտրակեղծարարությունը կազմակերպում էին այլ մարդիկ, իսկ ԿԸՀ-ն դա արդարացնում էր: Սակայն ներկա լույսի ներքո նայելիս ԿԸՀ-ն իր գործառույթները կիրականացնի և կեղծիքներ չեն լինի: Ես համոզված եմ, որ տեղի կունենա անհամեմատ նորմալ քվեարկություն: Ես վստահում եմ գործող իշխանության քաղաքական կամքին, որ իրենք ցանկանում են՝ լինի ազատ, արդար ընտրություններ»,-ասաց նա: 

Նշենք, որ ցուցակը բաղկացած է 49 հոգուց, որը գլխավորում է Րաֆֆի Հովհաննիսյանը, երկրորդը՝ Արմեն Մարտիրոսյանն է, ով գլխավորում է նաև նախընտրական շտաբը, եռյակը եզրափակում է Հովսեփ Խուրշուդյանը: