Վալերի Օսիպյանը՝ Հյուսիսային պողոտայից երաժիշտներին հեռացնելու մասին

Ոստիկանապետ Վալերի Օսիպյանն այսօր լրագրողների հետ զրույցում անդրադարձավ Հյուսիսային պողոտայից փողոցային երաժիշտներին հեռացնելու խնդրին, ինչը դժգոհության ալիք էր բարձրացրել:

«Սա այն հարցն է, որը մտահոգում է շատ-շատերին: Հաճելի է, երբ փողոցում երաժշտություն է հնչում, հատկապես, երբ զբոսաշրջիկները քայլում են և Հյուսիսային պողոտայում նկատում են նմանատիպ երաժշտություն: Դա գեղեցիկ է անցորդների համար, բայց այն աղմուկ է բնակիչների համար: Մենք ունենք բազմաթիվ ահազանգեր, բողոքներ այնտեղի բնակիչներից: Եկեք մի պահ պատկերացնենք մեզ այդտեղի բնակիչների տեղում, որոնք առավոտից մինչև երեկո լսում են այդ երաժշտությունը»,-ասաց Օսիպյանը:

Նա նշեց՝ առավոտյան համապատասխան հանձնարարական է տվել ոստիկաններին, որ մոտենան երաժիշտներին և  զգուշացնեն, որպեսզի երաժշտությունը շատ բարձր չլինի, որպեսզի չխախտվի համակեցության կանոնը և քաղաքացիների անդորրը: 

Անդրադառնալով Հյուսիսային պողոտայում փողոցային երաժիշների ու ոստիկանների միջև տեղի ունեցած միջադեպին, ոստիկանապետը նշեց, որ այդ ընթացքում օրենքի որևէ խախտում չի եղել: Նա նշեց, որ երաժիշտները եղել են օտարերկրացի, ազգությմաբ ոչ հայ. 

«Երկուսն էլ եղել են ոչ սթափ վիճակում, և միջադեպը եղել է երկուսի միջև, քաշքշել են իրար, տվել են միմյանց հայհոյանքներ և ոստիկանները ստիպված են եղել միջամտել, քանի որ անցորդներն են հենց ուղղորդել ոստիկաններին: Ոստիկանները նրանց մոտ տեսել են գարեջրի տարաներ, այսինքն՝ կոպիտ խախտում կար հասարակական վայրերում ալկոհոլի օգտագործման: Օրենքի սահմաններում բերման են ենթարկվել ոստիկանություն, որտեղ կազմվել է արձանագրություն, և ժամկետը լրանալուց հետո նրանք բաց են թողնվել ու այս պահին էլ ազատության մեջ են», - ասաց Օսիպյանը:

Նշենք, որ նախօրեին համացանցում տեսանյութեր տարածվեցին, որոնցում ոստիկանները ուժի գործադրմամբ Հյուսիսային պողոտայից հեռացնում էին ատարերկրացի երաժշտին։ Նա պնդում էր, որ սթափ է և չի հասկանում՝ ինչու՞ են իրեն տանում ոստիկանություն միայն այն բանի համար, որ նվագում էր պողոտայում: